Osydan birer aı buryn jattyǵý jumystaryn bastaǵan 53 jastaǵy Maık Taısonǵa qazirdiń ózinde túrli usynystar túsip jatyr. Máselen, aýstralııalyq promoýter Braıan Amatrýda óz elindegi 10 myń kórermenge eseptelgen Melbourne Arena jáne 30 myń adamdy syıdyra alatyn Princes Park stadıondarynda qaıyrymdylyq jekpe-jekter uıymdastyrýdy josparlap otyr. Eger qos tarap ortaq mámilege kelse, osy sapardan Maıktyń qalatasy qamıyp qaıtatyny anyq. Osy oıyn iske asyrý úshin Amatrýda Taısonǵa qarsylastardy da qarastyryp qoıǵan kórinedi. Sol sekildi basqa da beldi uıymdar men jekelegen baı-qýatty azamattar tarapynan joǵarydaǵydaı birneshe usynys túsýde.
Esterińizge sala keteıik, 1985-2005 jyldar aralyǵynda sharshy alańdy shaıqaǵan Maık Taıson 20 jasynda álem chempıony atanyp, osy ataqqa qol jetkizgen eń jas boksshy retinde tarıhta qaldy. Asa aýyr salmaqta 11 jyl boıy eshkimge des bermeı, qatarynan 46 jekpe-jekte jeńiske jetti. Barlyǵy 58 márte rıngke kóterilgen ol 50 ret basymdyq tanytty. 44 qarsylasyn uryp jyqty. Alty ret utylyp, taǵy eki básekeniń nátıjesi esepke alynbady.
