Onlaın konferensııa otyrysyna fılologııa ǵylymdarynyń doktorlary Serik Negımov, abaıtanýshy, alashtanýshy Tursyn Jurtbaı, Qulbek Ergóbek, Kúlash Ahmet, «Soltústik Qazaqstan» gazetiniń bas dırektory Jarasbaı Súleımenov, Jandos Smaǵulov, Rahymjan Turysbek, Sábıt Muqanov pen Ǵabıt Músirepovtiń memlekettik ádebı-memorıaldyq mýzeı kesheniniń dırektory, aqyn Ádilǵazy Qaıyrbekov, Saǵynbaı Jumaǵulov syndy birqatar zııaly qaýym ókili qatysty.
Jazýshylar Odaǵynyń Nur-Sultan qalalyq fılıalynyń dırektory Dáýletkereı Kápuly jıynǵa moderatorlyq etip, Sábıt Muqanovtyń ómiri men shyǵarmashylyǵyn keńinen nasıhattaý, jazýshydan qalǵan rýhanı mol murany oqyrman talqysyna usynýdyń mańyzyna toqtaldy. Sondaı-aq, jazýshynyń qazaq rýhanııatyndaǵy, ádebıetindegi jarqyn izi bar ekendigin, qalamger esimi árdaıym qurmetpen atalatyndyǵyn atap ótti. «Sábıt Muqanovtyń 100 jyldyq mereıtoıyna oraı Muqanovtyń irgeles inisi, qalamdas baýyry bolǵan ádebıetshi Tursynbek Kákishev «Egemen Qazaqstan» gazetine «Qazaq ádebıetiniń Atymtaı Jomarty» atty maqala jarııalaǵan bolatyn. Sodan beri attaı 20 jyl ótken eken. Búgingi Sábıt Muqanovtyń 120 jyldyǵyna arnalǵan konferensııada zııaly qaýym ókilderimen jaqsy áńgime ótkizsek dep otyrmyz», dedi Dáýletkereı Kápuly.
Konferensııa barysynda sóz alǵan ǵalymdar men zertteýshiler jazýshynyń qazaq ádebıettaný ǵylymyndaǵy orny men onyń zertteýlerindegi Abaı, Shákárim murasy jáne shyǵarmashylyq zerthanasyna qatysty máselelerdi kóterip, tarıhı shyndyqqa baı, dáýir tynysy keń qamtylǵan shyǵarmalary men saıası-áleýmettik, qoǵamdyq isterdegi orny týraly jan-jaqty talqylady.
Qazaqstan Jazýshylar odaǵy basqarma tóraǵasynyń orynbasary, aqyn Baýyrjan Jaqyp qazaq ádebıetinde Sábıt Muqanov shyǵarmashylyǵynyń aıryqsha máni bar ekenin áńgimeleı kelip, sóz óneriniń qaı salasyn zerttegen ǵalymnyń Sábeńniń shyǵarmashylyǵyna soqpaýy múmkin emestigin, artynda qaldyrǵan mol murasynyń salmaǵy orasan ekenin jetkizdi. Al L.N.Gýmılev atyndaǵy Eýrazııa Ulttyq ýnıversıtetiniń professory, fılologııa ǵylymdarynyń doktory Serik Negımov Sábıt Muqanov shyǵarmashylyq jolynyń ár kezeńinde halqymyzdyń ómiri men kúresin shynaıy beıneleıtin kesek shyǵarmalar jazyp, ulttyq ádebıetimizdi órkendete jolynda belsendi eńbek etip etkenin, dál osy sebepti týǵan halqynyń súıispenshiligi men laıyqty qurmetine bólengenin jetkizdi.
– Myń syrly Sábıt Muqanov ǵasyrdyń perzenti, ǵasyr sýretkeri. Muhtar Áýezovtiń Abaı Qunanbaev atty monografııalyq zertteýinde «Abaıdyń ómirin, dáýirin zerttep júrip, keıde kemshilikti qate pikir aıtqan bolsa da, negizinde Abaıdy taný ǵylymynda eleýli eńbek etken adamdar: Sábıt Muqanov, Muhtar Áýezov, Qajym Jumalıev, Esmaǵambet Ysmaılov, Beısenbaı Kenjebaev, Belgibaı Shalabaev sııaqty taǵy bir talaı ádebıet tarıhshylary men jazýshylar» dep atap ótken. Sábıt 1930 jyly Máskeýde Abaıdyń «Qor boldym, janym» ánin A.V. Zataevıchke jazdyrtady. 1945 jyly Abaıdyń 100 jyldyǵyna oraı shyqqan akademııalyq basylymda eń salmaqty sózdi Sábeń jazady. 1944 jyldary Abaı týraly tolymdy monografııalyq eńbek jazdy. Osy eńbekte Sábeń Abaıdyń qazaqtyń jazba ádebıeti tarıhyndaǵy ornyn, qazaqtyń ádebı tilin damytýdaǵy tarıhı ornyn, aqynnyń poezııaǵa qosqan jańalyqtaryn, kórkemdigin aıtyp ótedi», dep jazýshynyń Abaı muralary jóninde kóptegen eńbekter jazyp, ádebıet zertteý máselesinde teorııalyq jaǵynan tyń pikirler usynǵanyn aıtty. Budan bólek jıynda sóz alǵan fılologııa ǵylymdarynyń doktory, abaıtanýshy, alashtanýshy Tursyn Jurtbaı, Iаssaýı atyndaǵy Halyqaralyq qazaq-túrik ýnıversıtetiniń professory, fılologııa ǵylymdarynyń doktory Qulbek Ergóbek, Ál-Farabı atyndaǵy Qazaq Ulttyq ýnıversıtetiniń professory, fılologııa ǵylymdarynyń doktory Kúlásh Ahmet qazaq ádebıetine jańasha sıpat daryta bilgen Sábıt Muqanovtyń ádebıet álemindegi qarjyly eńbegi men qazaq qalamgerleriniń ádebıet jolyndaǵy bastapqy shyǵarmashylyq qadamdaryna qoldaý kórsetken adamı janashyrlyǵy týrasynda oı bólisip, baıypty pikirlerin ortaǵa saldy.
– Sábıt Muqanov – qazaq halqynyń ózi. Muqanovtyń ádebı murasy myń ǵasyrlyq shejire tarıhy deýge bolady. Odan bas tartar bolsaq qazaq halqy óz rýhanııatynan bar tartqan bolar edi. Solaqaı saıasat kezeńinde qyzmet ete júrip, sovet saıasatyn qazaq rýhanııatyn damytýǵa baǵyttaǵan jazýshynyń eńbegi eresen, – dep baǵalaǵan fılologııa ǵylymdarynyń doktory Qulbek Ergóbek qalamger murasy týraly ústirt pikir aıtýshylardyń bar ekenin, ǵylym men ádebıettiń dálel men dáıekke súıengende ǵana órge jyljıtynyn alǵa tartty.
