Sýretterdi túsirgen Nurbek IHSAN
Uly Jeńis kúni aýylda turatyn 94 jastaǵy qarııany Aqjaıyq aýdanynyń ákimi qalııar Aıtmuhambetov arnaıy kelip quttyqtap, aqsaqalǵa Prezıdent Qasym-Jomart Toqaevtyń, oblys ákimi Ǵalı Esqalıevtiń jáne óziniń atynan alǵys hattar men estelik syılyqtar tabystady. Batys Qazaqstan olblysynyń ákimi Ǵalı Nájimedenuly ardagerdi beıne baılanys arqyly onlaın quttyqtap, denine saýlyq, otbasyna amandyq tiledi.
Ardagerge kútpegen syılyqty ilbishindik jeti kásipker jasady. Zaıdok О́teǵalıev, Eseı Qalentaev, Amanqul Batyrǵalıev, Samat Muqanov, Aıtqanym Qabanova, Aqylbek Sagıtov jáne Tilegen О́temisov Aqjaıyq aýdany boıynsha tiri júrgen jalǵyz maıdangerge «Lada Granta» avtokóligin alyp berdi.
Supyǵalı Esimov maıdanǵa 1944 jyldyń qarasha aıynda alynǵan eken. Oqý-jattyǵý jıynynan ótken soń I Ýkraına maıdanynda 1170 atqyshtar polkinde pýlemetshi, bólimshe komandıri bolyp, jaýǵa qarsy jan aıanbaı soǵysqan. Soǵystan keıin de Estonııadaǵy qupııa atom zaýytynda qyzmet etip, 3278 áskerı bólimde komandır bolǵan. Elge tek 1955 jyly oralypty.
- Bizdiń Aqjaıyq aýdanynan soǵysqa 11 myńnan astam jaýynger attanǵan eken. Sonyń 5 myńnan astamy jaý qolynan qaza tapty. Surapyl soǵys jalyny sharpymaǵan shańyraq joq. Supyǵalı atamyz – aýdanymyzda soǵys otyn kórgen sońǵy ardager edi. Maıdangerdi qurmettep, búgingi zamannyń atyn mingizgen kásipkerlerge alǵys aıtamyn. Eldiń órkendeýi, kásipkerliktiń damýy, aýyl azamattarynyń baqýatty tirligi – dál osy beıbitshiliktiń, bizge beıbit kún syılaǵan ardagerlerdiń arqasy, - deıdi aýdan ákimi Qalııar Shadııaruly.
Aqjaıyq aýdany – jalyndy aqyn, Uly Otan soǵysynyń ardageri, maıdan tilshisi Juban Moldaǵalıevtiń týǵan jeri. Bıyl aýdanda mereıtoılyq sharalar keń kólemde ótýi josparlanǵan bolatyn. Karantınniń kesirinen kóp sharalar keıinge ysyrylyp tur. Degenmen, búgingi jeńis kúni azamat aqynynń Chapaev aýylyndaǵy eskertkishi de gúlmen kómkerildi.
Batys Qazaqstan
