Svetlana Ozǵannyń sózine súıensek, soǵys ardagerin izdeýge sebep bolǵan ujymdastardyń saıtqa silteme jiberýi.
-Bul saıttyń baryn burynnan da biletinbiz. Birneshe ret osyǵan deıin de qarap, atam týraly aqparat tappaǵan edik. О́tken aptada áriptesterim saıtqa silteme jibergen soń taǵy bir ret izdep kóreıin dep sheshtim. Osyǵan deıin Ozǵan Qosanov dep izdep kelgen edik. Al osy joly orys tilinde aty-jóni basqasha jazylǵan bolar dep ártúrli izdeý túrlerin jasadym. Nátıjesinde saıttan «Osgan Hasanov» dep shyqty. Saıttaǵy málimetterge súıensek ol qazirgi Tver oblysyndaǵy «Bobachevskıı bor» baýyrlastar qabirinde jerlenipti, deıdi ustaz qýanyshyn jasyra almaı.
Otyz jyldan astam muǵalim bolyp eńbek etip kele jatqan Svetlana Ozǵannyń atasy Ozǵan Qosanov 1906 jyly týylǵan. Uly Otan Soǵysy bastalǵan sátte sol kezdegi Gýrev oblysy Mańǵystaý aýdany Ondy eldi mekeninen jubaıy Maqpal Qosanovany eki uly jáne ákesi Qosanmen birge aýylda qaldyryp soǵysqa ketken. Atamyz 1942 jyldyń jeltoqsanynda qatty jaraqattar alyp, 1943 jyldyń 21 qańtarynda qaıtys bolǵan. Aýylǵa qaraly qaǵaz kelgenmen maıdanger Kalının qalasynyń túbinde jerlendi degen derek qana belgili bolǵan.
-Atamyzdyń jatqan jerin izdestirip, osy kúnge deıin taba almaı kelgenbiz. Ákem Turash Ozǵanov ákesiniń basyna topyraq salýdy armandap ketken. Sóıtsek, aty-jóni qate jazylǵan eken. 77 jyl ótkende jáne Uly jeńiske 75 jyl qarsańynda «Pamıat naroda» saıtynan kezdeısoq taýyp aldyq. Atamyzdyń aty qate jazylǵan eken. Topyraǵy torqa bolyp, jany jannatta bolsyn, dedi Svetlana Turashqyzy.
Aıta ketý kerek, 2007 jyly Reseı Federasııasynyń Qorǵanys mınıstrligi «1941-1945 jj. Uly Otan soǵysyndaǵy Qyzyl ásker men Áskerı-Teńiz flotynyń arhıv qujattaryn jarııalaý» týraly buıryq shyǵarady. Ustazdyń atasy týraly derek osy qujatta bolǵan. Sonymen qatar, saıtta jaýyngerler týraly derekterden bólek, baýyrlastar qabiri týraly derekter, jerlengenderdiń aty-jóni kórsetilgen taqtatastardyń fotosyna deıin kórsetilgen.
Endi pedagog osy jazda atasynyń basyna baryp, ákesi armandap ketken bir ýys topyraqty salýdy josparlap otyr.
Mańǵystaý oblysy
