Búgin Almaty qalasy ákimdigimen birlesip 8 júk kóligine tıelgen 98 tonna azyq-túlik, qurylys materıaldary, kıim-keshek jáne basqa turmystyq zattar jóneltildi.
«Metall Prom Grýpp» JShS aýmaǵynda jasaqtalǵan kerýen jolǵa shyǵar aldynda QHA Tóraǵasynyń orynbasary Janseıit Túımebaev aqjol tilep, qaıyrymdylyq kómekke atsalysqan etnos ókilderine alǵys bildirdi. Sonyń ishinde Almaty ózbek etnomádenı birlestigi, Qazaqstan uıǵyrlarynyń Respýblıkalyq etnomádenı birlestiginiń fılıaly, Almaty qalalyq uıǵyr etnomádenı birlestigi, Qazaqstan Dúngen qoǵamynyń Almatydaǵy fılıaly, sondaı-aq «Ahyska» túrik etnomádenı birlestigi jáne basqa da ortalyqtardyń eńbegin aıryqsha atap ótti.
Janseıit Túımebaev óz sózinde Qazaqstan halqy Assambleıasynyń 4 mamyrda Maqtaaraldaǵy tótenshe jaǵdaıǵa baılanysty gýmanıtarlyq kómek kórsetý aksııasyn bastap, etno-mádenı birlestikterden túsken qarjy kólemi 23 mln 325 myń teńgeni quraǵanyn jetkizdi. Almatyda 98 tonna kúndelikti turmysqa qajetti buıymdar men hımııalyq zattar, azyq-túlik jáne basqa kerek-jaraq jınalsa, Jambyl oblysy Qordaı aýdany 5 mln 500 myń teńgege azyq-túlik jóneltken.
«Vynhýa» dúngen etno-mádenı birlestigi jibergen 11 tonna un, 2,5 tonna qant, 2,5 tonna kúrish, 1,5 tonna makaron jáne 1500 lıtr ósimdik maıy, 5,3 tonna kartop, 500 keli pııaz, 300 keli tuz, 1000 qorap sháı ónimderi men 25 keli turmystyq-gıgıenalyq zattardy Maqtaaral aýdany qýana qabyldap aldy.
