Atalǵan zań jobasy oıyn bıznesi salasyndaǵy zańnamany jetildirýge jáne bás tigýge qatysýshylardyń quqyqtary men zańdy múddelerin qorǵaýdy kúsheıtýge, sondaı-aq býkmekerlik keńseler men totalızatorlardyń qyzmetin baqylaýdyń tıimdiligin arttyrýǵa baǵyttalǵan.
Zań jobasyn depýtattardyń nazaryna Mádenıet jáne sport mınıstri Aqtoty Raıymqulova usyndy.
– Oıyn bıznesi týraly zańda qumar oıyndar men bás tigýge qatysýdan ózin-ózi shekteý tetigi engiziledi. Ýákiletti memlekettik organdardy býkmekerlik keńseler men oıynshylardyń arasyndaǵy aqsha operasııalary týraly tolyq jáne durys aqparatpen qamtamasyz etý úshin, sondaı-aq bás tigýge qatysýdan shekteý tetigin iske asyrý úshin Stavkalardy esepke alý ortalyǵyn qurý kózdeledi. Qazirgi ýaqytta salany memlekettik retteýdiń mańyzdy problemasy bolyp býkmekerlik keńseler men totalızatorlardyń aınalymy týraly naqty málimetterdiń bolmaýy bolyp tur. Osyǵan baılanysty Stavkalardy esepke alý ortalyǵyn qurý usynyldy. Bul rette býkmekerlik keńsege qolma-qol nemese elektrondy tólem júıeleri arqyly túsetin barlyq tólem eskeriledi. Býkmekerlik keńseler men totalızatorlarǵa túsetin barlyq tólemniń biryńǵaı esebi kóleńkeli aınalymdy boldyrmaýdy, salyqtardyń jınalýyn arttyrýdy baqylaýdy kúsheıtedi, – dedi mınıstr.
Buǵan qosa zań jobasy bás tigýge qatysýshylardyń derekter qory jalpyǵa birdeı deklarasııalaýdy engizýge, bás tigýge qatysatyn klıetti shekteý jáne klıenttiń ózin-ózi shekteý rásimin engizýge yqpal etedi. Sondaı-aq qylmystyq jolmen alynǵan kiristerdi jylystatýǵa jáne terrorızmdi qarjylandyrýǵa qarsy kúres jónindegi sharalardy kúsheıtedi.
Oqıǵanyń nátıjesindegi ashyqtyqty jáne oıynshylardyń quqyqtaryn qamtamasyz etý maqsatynda býkmekerlik keńselerge tek sporttyq sharalarǵa stavka qabyldaý mindetin belgileý usynylyp otyr.
