Tikeleı efırde – «FORTE-TRIO»

Tımýr Ýrmancheevti bul jobada tek pıanıst retinde ǵana tanyǵan joqpyz. Mýzykant ár shy­ǵarmany bastamas buryn kom­po­zıtorlar men týyndynyń tól tarıhyn qyzǵylyqty etip áńgi­melep, óner jaıynda jańa bir syr shertti. Bul kórermenderge mýzykany tereńirek túsinýge, avtordyń ishki tolǵanysyn ózinshe sezinýge múmkindik berdi.

– Konserttiń formaty óte erekshe: baǵdarlama boıy (eki saǵatqa jýyq) birde-bir sekýnd boıyńdy erkin ustaýǵa múmkindik joq, óıtkeni únemi kórermenniń nazarynda bolasyń. Basqa ártis­ter óner kórsetip, ne bolma­sa júrgizýshi sóılegen ýaqytta sah­nanyń syrtyna shyǵýǵa da múmkindik tabylmaıdy. Tipti kórermenniń yqylasy seziletin qol shapalaqtary estilmeıdi. Bul qubylys jat kóringenmen, óte qyzyq jáne jańa áser syılaıdy! Karantın kezindegi onlaın konsertter ártisterge kó­rermendermen baılanysty jo­ǵaltpaı, oryndaýshylyq she­ber­lik­ti shyńdaýǵa jaqsy múmkindik berdi. Buǵan qosa, ónersúıer qaýym da úıden shyqpaı, súıikti ártis­teriniń ónerin tamashalaı alady. Tikeleı efırdegi konsertter kórermender arasynda joǵary suranysqa ıe boldy. Tipti qazirgi ýaqytta, biz, ártister, tyńdarman qaýym karantınnen keıin konserttik zaldarǵa kele me eken dep alańdaımyz, – deıdi ol.

Konsertte vokaldyq mýzyka aspaptyq áýenmen tamasha úılesti. Onyń shaqyrýymen kon­serttik baǵdarlamaǵa trıonyń músheleri, talantty mýzykanttar – skrıpkashy Dınara Bazarbaeva-Sahaman jáne vıolonchelshi Murat Narbekov, sondaı-aq belgili ánshi Azamat Jyltyrkózov qatysty. Vokalıst qazaqtyń halyq áni «Alqońyr», B.Sheremetevtiń
«Iа vas lıýbıl», E.Grıgtiń «Lıýblıý tebıa», F.Shýberttiń «K mýzyke» jáne t.b. kóptegen shyǵarmalardy jan-dúnıesimen oryndady. Keshte barshaǵa tanys kompozısııalar shyrqaldy, atap aıtqanda, «Iаpýraı», P.I.Chaıkovskııdiń «Shelkýnchık» baletinen ıntermesso, M.Raveldiń «Skerso» jáne ózge de týyndylar tyń­dar­manǵa jol tartty.

Erekshe qoshemetpen qarsy alǵan ónersúıer qaýym keremet mýzyka, erekshe jyly, jaıly atmosfera úshin alǵys aıtyp, mýzykanttar men kórer­men arasyndaǵy qashyqtyq sezil­megenin aıtyp, qoshemet bil­dirip jatty. «Mýzykanttardy osyn­shalyqty jaqyn kórip, oryndaý kórkemdigin, barsha qımyl-qozǵalystyń ásem kerbezdigin, sezim­tal júzderin, tipti trıo­nyń joǵary kásibıligine qara­mas­tan, ártisterdiń sál qobal­jyǵan sátterin baqylaý erekshe kóńil kúı syılady!», dedi tyńdarmannyń biri.