Máýlen Áshimbaevtyń aıtýynsha, Senat bul jaǵdaıda óz jumysyn tıimdi uıymdastyrýǵa tıis. Sol arqyly Elbasy saıasatynyń sabaqtastyǵyn saqtaı otyryp, Memleket basshysy usynǵan damý strategııasyn iske asyrýdy zańnamalyq turǵyda qamtamasyz etýi qajet.
Otyrysta senatorlar «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» zań jobasyn qarady. Qujattyń negizgi mindeti – azamattardyń beıbit jáne qarýsyz jınalý, jınalys, mıtıng pen demonstrasııa, sherý men pıketteý ótkizý boıynsha konstıtýsııalyq quqyǵyn iske asyrý, sondaı-aq, olardyń ótkizilýi múmkin arnaıy oryndaryn aıqyndaý.
Memleket basshysynyń tapsyrmasy boıynsha jobada beıbit jınalystar ótkizý úshin habarlama tártibin engizý kózdelgenin de atap ótken jón.
Depýtattar zań jobasyn talqylaý barysynda birqatar tujyrymdamalyq ózgerister usyndy. Máselen, Nur-Sultan, Almaty, Shymkent qalalarynda jáne oblys ortalyqtarynda pıketter, jınalystar men mıtıngiler úshin arnaıy oryndar sany qalanyń árbir aýdanynyń ortalyq bóliginde keminde úsheý bolý kerektigi aıtyldy. Sonymen qatar beıbit jınalystardy uıymdastyrýshynyń oǵan qatysýshylardan óz betin búrkemeýdi, onyń ishinde bet-álpetin tanýǵa kedergi keltiretin kıim-keshekti nemese ózge de zattardy paıdalanbaýdy talap etý jónindegi mindetin alyp tastaý usynyldy. Bul rette uıymdastyrýshylar men qatysýshylardyń densaýlyq saqtaýǵa arnalǵan jeke qorǵanysh quraldaryn paıdalaný jónindegi quqyǵyn bekitý máselesi nazarǵa alynǵan. Senatorlardyń osy jáne basqa da túzetýleri qujattyń qorytyndy mátininde kórinis tapty.
Máýlen Áshimbaev azamattardyń konstıtýsııalyq quqyqtaryn qamtamasyz etý úshin qabyldanatyn zań jobasynyń mańyzyn atap ótti.
– Qaralǵan zań jobalary elimizdiń odan ári damýyna oń áser etedi. Usynylyp otyrǵan qujattar Qazaqstandaǵy saıası úderisterdi odan ári damytý, adam quqyqtaryn qamtamasyz etý men demokratııalandyrý jolyndaǵy mańyzdy qadam dep aıtýǵa tolyq negiz bar, – dedi Senat Tóraǵasy.
Jańa zań jobasynda beıbit jınalystardy uıymdastyrýshylardyń, olarǵa qatysýshylardyń mártebesi, quqyqtary men mindetteri bekitildi jáne memlekettik organdardyń quzyreti belgilendi. Sondaı-aq, beıbit jınalystardy ótkizýge ruqsat bermeıtin negizderdiń barynsha tolyq tizbesi naqtylandy, ári bas tartý dáleldi jáne negizdi bolýy tıis ekeni aıqyndaldy.
Odan basqa, beıbit jınalystarǵa qatysýshynyń (qatysýshylardyń) zańnama talaptaryn buzýy beıbit jınalystardy toqtatýǵa negiz bola almaıtyny týraly ereje usynyldy.
Otyrysta beıbit jınalystardy uıymdastyrý jáne ótkizý tártibi máseleleri boıynsha keıbir zańnamalyq aktilerge ózgerister men tolyqtyrýlar engizý týraly ilespe qujat ta qaraldy.
Talqylaý qorytyndysy boıynsha Senat zań jobalaryn engizilgen ózgeristermen jáne tolyqtyrýlarmen Májiliske jiberý týraly sheshim qabyldady.
Sonymen qatar depýtattar «Qazaqstan Respýblıkasynyń keıbir zańnamalyq aktilerine tótenshe jaǵdaı máseleleri boıynsha ózgerister men tolyqtyrýlar engizý týraly» zańdy qabyldady. Qujat azamattardyń qaýipsizdigin qamtamasyz etý jáne konstıtýsııalyq qurylysty qorǵaý úshin tótenshe jaǵdaı kezeńinde shuǵyl shara qabyldaý maqsatynda ázirlengen bolatyn. Qosymsha baıandama jasaǵan Tóleýbek Muqashevtyń aıtýynsha, zań jobasyn iske asyrý daǵdarysqa qarsy tıimdi saıasat arqyly barlyq memlekettik júıeniń áleýmettik-ekonomıkalyq turaqtylyǵy men ornyqtylyǵyn jáne ulttyq qaýipsizdikti qamtamasyz etýge múmkindik beredi.
Budan basqa senatorlar zańnamaǵa jumyldyrý daıyndyǵy men jumyldyrý máseleleri boıynsha túzetýler engizý týraly zańdy qabyldady. Qujattyń maqsaty – jumyldyrý daıyndyǵy men jumyldyrý júıesin, sondaı-aq memlekettik materıaldyq rezervti qalyptastyrý, saqtaý jáne paıdalaný bóliginde azamattyq qorǵaýdyń memlekettik júıesin jetildirý. Senator Talǵat Musabaev zań jobasyn qabyldaý adamdardyń jumyldyrý daıyndyǵy salasyndaǵy mindetterin oryndamaǵany úshin jaýapkershiligin arttyrýǵa, jumyldyrý daıyndyǵy men jumyldyrý boıynsha is-sharalardyń uıymdastyrylýyna jáne ótkizilýine turaqty baqylaý ornatýǵa, memlekettik materıaldyq rezervtegi materıaldyq resýrstardyń qoryn saqtaýǵa jáne ýaqtyly jańartýǵa múmkindik beretinin atap ótti.
Sondaı-aq, Joǵarǵy palata depýtattary Mamandandyrylǵan mekemelerdiń artyqshylyqtary men ımmýnıtetteri týraly konvensııany da ratıfıkasııalady. Qazaqstan aýmaǵynda mamandandyrylǵan mekemelerdiń qyzmeti úshin Konvensııada kórsetilgen erekshe jaǵdaılardy jasaý ratıfıkasııalaýdyń negizgi mindeti bolyp tabylady. Atap aıtqanda, mundaı mekemeler, olardyń aktıvteri, kiristeri jáne basqa da menshigi barlyq tikeleı salyqtardan bosatylady, al laýazymdy adamdar Birikken Ulttar Uıymynyń laýazymdy adamdaryna tıesili jeńildikterdi paıdalanady. Qosymsha baıandamashy Tóleýbek Muqashevtyń aıtýynsha, zań jobasyn qabyldaý elimizde mamandandyrylǵan mekemelerdiń ekijaqty jáne kópjaqty yntymaqtastyqty keńeıtýge jáne tereńdetýge, onyń úılestirilýi men tıimdiligin arttyrýǵa yqpal etetin qyzmetine qolaıly jaǵdaı jasaıdy.
