Sotqa deıingi tergeýdi jeńildetilgen (jyldam) túrde ótkizý – memleket pen qylmystyq prosess qatysýshylarynyń ýaqytyn, kúsh pen qarajatyn únemdeýge múmkindik beredi. Sotqa deıingi tergeýdiń bul túri kinásin moıyndaý, jınalǵan dálelderdiń jetkilikti bolýy jáne daýlaýǵa kelmeýi, sondaı-aq keltirilgen shyǵyn somasymen kelisken jaǵdaıda qoldanylady. Sotta kúdiktilerdiń jazasy jeńildetilýi múmkin. Budan bólek, sotqa deıingi jeńildetilgen tergeý tergeýshilermen (anyqtaýshylarmen) baılanysty barynsha azaıtyp, tergeýdi qylmys tirkelgen kúnnen on bes kún ishinde aıaqtaýǵa múmkindik beredi.
Máselen, túngi kezekshilikte júrgen krımınaldyq polısııa qyzmetkerleriniń qyraǵylyǵy arqasynda izin sýytpaı ashylǵan urlyq boıynsha materıaldar sotqa eki apta ishinde daıyndaldy.
Karantın kezinde 29 sáýir kúni shamamen saǵat 5:30-da Ekinshi polısııa bólimine 1978 jáne 1991 jylǵy úsh qala turǵyny jetkizildi. Olar mys kabeliniń oramy salynǵan mashınamen júrgen. Úsheýi de elektromonter bolyp shyqty, alaıda, olarda túngi ýaqytta jumys júrgizýge quqyq beretin qujattary bolmaǵan. Hattama toltyrylyp jatqan kezde krımınaldyq polısııa qyzmetkerleri «RTJ» AAQ qoımasynan mys kabeldiń joǵalǵanyn anyqtady. Keltirilgen shyǵyn somasy 4 mln teńgeden asady.
Atalǵan fakti QR Qylmystyq kodeksiniń 188-baby 3-bóligi (urlyq) boıynsha sotqa deıingi tergep-tekserýdiń biryńǵaı tizilimine engizildi. Qazirgi ýaqytta kúdiktiler eshqaıda ketpeý týraly qolhatpen jiberildi. Avtokólikter arnaıy turaqqa qoıyldy. Ákimshilik sot ótip, buzýshylardyń árqaısysyna QR Ákimshilik quqyq buzýshylyq týraly kodeksiniń 476-baby boıynsha aıyppul salyndy.
– Qalypty qylmystyq óndiristiń merzimi eki aı bolsa, jeńildetilgen sotqa deıingi tergeýdiń shekti merzimi – 15 kún, – dep atap ótti SQO Polısııa departamenti Tergeý basqarmasynyń basshysy Qaırat Qasymbekov. – Bul qyzmetkerlerdiń ýaqyty men qaýqaryn aıtarlyqtaı únemdeıdi, sarsańdy boldyrmaı, bar kúsh-jigerdi kúrdeli tergeýge salýǵa múmkindik beredi. Qazirgi ýaqytta oblysta qylmystardyń shamamen 30% jeńildetilgen sotqa deıingi tergeý sheńberinde tergeledi, jyl basynan jeńildetilgen sotqa deıingi tergeý boıynsha sotqa 171 is joldandy.
