Baıqaýǵa qatysýǵa elimizdiń túkpir-túkpirinen ótinishter kelip tústi. Barlyǵy 26 bala qatysty. Olar turmys-salt, ádet-ǵuryp, dúnıetanym kózqarasyn saqtaýǵa, adaldyqqa, eńbekke úndegen qazaq halyq ertegisinen bastap, álem ertegilerin naqyshyna keltire aıtyp berdi. Qatysýshylar arasyndaǵy eń kishkentaı almatylyq 2 jasar úmitker Saltanat Nurbaqyt ta óz baǵyn synap kórdi. Ertegini mzmundap qana qoımaı, san-alýan sahnalyq kórinister arqyly jetkizgen talapty balaqaılardyń vıdeo-montaj jumystary úshin de az eńbektenbegeni baıqalady.
Redaksııa alqasy qatysýshy balalardyń oı-órisin, sózdik qoryn, tanymdyq-shyǵarmashylyq qabiletteri men jumystardyń kórnekiligin baǵalaı kele úzdik jeńimpazdardy anyqtady.
Almatylyq Láılá Dúısenáli (5 jasta) jáne Jambyl oblysy, Talas aýdany, Oıyq aýylyndaǵy D.Qonaev atyndaǵy orta mektebiniń 2-synyp oqýshysy Araılym Meırambek, Nur-Sultan qalasy, B.Maılın atyndaǵy №52 mektep-gımnazııasynyń 2-synyp oqýshysy Erdos Tólegenovtiń jumysy birinshi orynǵa ıe boldy. Al Semeı qalasy, №37 gımnazııasynyń 1-synyp oqýshysy Elnazar Jaqyshev, Aqtóbe qalasy, M.Maqataev atyndaǵy №73 mektebiniń 2-synyp oqýshysy Janerke Jolaman, Mańǵystaý oblysy, Beıneý aýdany J.Qaldyqaraev atyndaǵy orta mektebiniń 2-synyp oqýshysy Abylaıhan Asqar joǵary shyǵarmashylyq izdenisteri úshin ekinshi orynǵa laıyq dep tanyldy. Shymkent qalasy, №83 mektebiniń 1-synyp oqýshysy Nurmuhammed Qaraqul, Jambyl oblysy, Talas aýdany, Oıyq aýyly, D.Qonaev atyndaǵy orta mektebiniń 1-synyp oqýshysy Aslanbek Meırambek belsendi qatysqany úshin júldeli úshinshi orynnan kórindi. Jeńimpazdarǵa «Egemen Qazaqstan» gazeti álemniń zamanaýı klassıkasyna aınalǵan tamasha ertegiler toptamasyn tartý etip, dıplommen marapattaıdy. Ertegi aıtý dásúrin jańǵyrtýǵa úles qosyp, jan-jaqty daıyndyǵymen kózge túsken ózge de qatysýshy baldyrǵandarǵa arnaıy yntalandyrý syılyqtary tapsyrylady.
Qazaq radıosyndaǵy «Erden atanyń ertegileri», «Zámzágúl ájeniń ertegileri», «Keshki ertegiler» degen atpen úzilissiz berilip turatyn izgilikti dástúrdiń jalǵasyndaı bolǵan joba az ýaqytta óz tyńdarmandaryn taýyp úlgerdi. «Balalarǵa bazarlyq» ertegiler toptamasyn «Egemen Qazaqstan» gazetiniń YouTube arnasynan kún saıyn tyńdaı alasyzdar.
