Ulttyq ekonomıka mınıstri R. Dálenov, Qazaqstan et-sút odaǵy qaýymdastyǵynyń basqarma tóraǵasy I. Saýer, «Qazaqstan kásipkerleriniń forýmy» Qaýymdastyǵy Keńesiniń tóraǵasy R. Batalov, Qazaqstan mashına jasaýshylary odaǵynyń tóraǵasy M. Pishembaev, «KazakhmysCopper» basqarmasynyń tóraǵasy B. Qyryqpyshev, «Atameken» UKP tóraǵasy A. Myrzahmetov baıandama jasady.
Keshendi jospar 10 baǵyttan jáne iskerlik belsendilikti yntalandyrý, jumyspen qamtýdy qoldaý jáne halyqtyń tabysyn arttyrý jónindegi 172 júıeli ári salalyq sharalardan turady. Qujat jobasyn barlyq múddeli taraptar jáne bıznes-qoǵamdastyq, onyń ishinde «Atameken» ulttyq kásipkerler palatasy men salalyq bıznes qaýymdastyqtar egjeı-tegjeıli talqylap, maquldaǵan.
«Keshendi jospardy iske asyrý syrtqy orta tıgizetin keleńsiz áserdi barynsha azaıtýǵa, asa mańyzdy salalardyń bárin jáne otandyq bıznes qyzmetin jandandyrý boıynsha praktıkalyq is-sharalardy qamtýy tıis», — dedi A. Mamın.
Usynylyp otyrǵan sharalar qarjylandyrý jáne jeńildikti nesıe berý tetikterin, onyń ishinde mıkrobıznes tetikterin edáýir keńeıtýdi, eksporttyq shyǵyndardy kepildendirý jáne óteý quraldaryn belsendi túrde qoldanýdy kózdeıdi. Forvardtyq jáne uzaq merzimdi offteık-kelisimsharttar jasasý praktıkasy engiziledi. Júkteme azaıady jáne salyqtyq ákimshilendirý jeńildetiledi, salyqtar men qaryzdar boıynsha preferensııalar men tólemdi keıinge qaldyrý qoldanylady, jekelegen aıyppuldar men alymdar alynyp tastalady, ákimshilik kedergiler azaıtylady.
Turǵyn úı qurylysy naryǵynda suranysty yntalandyrýdyń, otandyq óndiristi jáne qyzmet kórsetý salasyn qoldaýdyń jańa tásilderi engiziledi.
«Jalpy, Keshendi josparda kózdelgen sharalar birqatar salalardyń belsendiligin qalpyna keltirýge múmkindik beredi. Bul salalarda 6 mln-nan asa adam jumyspen qamtylǵan», — dedi A. Mamın.
Úkimet basshysy memlekettik organdardyń birinshi basshylaryna, óńirler ákimderine Jospardyń is-sharalaryn belgilengen merzimde sapaly túrde iske asyrýdy qamtamasyz etýdi tapsyrdy.
«Memleket basshysynyń tapsyrmasy boıynsha álemdik jáne ulttyq ekonomıkadaǵy jaǵdaıdyń kúrt ózgerýine baılanysty 2025 jylǵa deıingi strategııalyq damý jospary jańa redaksııada ázirlenedi. Ol ınstıtýsıonaldyq jáne qurylymdyq reformalardy júrgizýdi qamtıtyn eldiń orta merzimdi kezeńge arnalǵan jańa ekonomıkalyq baǵytynyń negizgi baǵyttaryn aıqyndaıdy», — dep A. Mamın, osy jyldyń 1 shildesine deıin qujattyń jańa redaksııadaǵy jobasyn ázirleýdi tapsyrdy.
