Qala irgesindegi Jubanov kóshesiniń turǵyndaryn 30 jyldan beri jol máselesi alańdatýda. Alty jyldan beri qurylysy aıaqtalmaı kele jatqan mektep, ıesiz qalǵan transfarmator. Keshe bazynasyn aıtqan turǵyndarmen qala ákimi Amangeldi Smaıylov kezdesti. Ol halyqtyń shaǵymyn tyńdap, taıaý arada tap-tuınaqtaı etip sheshýge ýáde berdi.
Kezdesý barysynda aıtylǵan shaǵym az emes. Bul shaǵyn aýdanda sál ǵana jel soǵyp, daýyl tursa elektr qýaty óship qalady. Bıylǵy kóktemde mundaı oqıǵa birneshe ret qaıtalandy. Elektr qýatymen qamtyp turǵan trasformatordyń ornatylǵanyna da biraz ýaqyt ótti. Degenmen, turǵyndar onyń tehnıkalyq jaǵdaıyn qadaǵalap, ıe bolyp júrgen eshkimdi kórmegen.
–Men osy jerge birinshi qonystanǵan adamnyń birimin. Myna transformator meniń kóz aldymda salyndy. Sodan beri jarytyp jumys istegen emes, deıdi qala turǵyny Berik Jumaǵulov.
Qala basshysy bul máseleniń taıaý ýaqytta oń sheshimin tabatyndyǵyn aıtyp, kópshilikti ılandyrýǵa tyrysty. Ákimniń ýájine qaraǵanda, endi elektr qýatyna jaýapty «Invest Elektro» mekemesi bolmaq.
–Biz bul transformatordy kommýnaldyq menshik ıeligine berdik. Mekeme basshysyn turǵyndarmen kezdestirdik. Telefonyn berdik. Endi apatty jaǵdaı oryn alsa, olar birden keledi. Iаǵnı, dıspetcherlik qyzmet qurylady, deıdi Kókshetaý qalasynyń ákimi Amangeldi Smaıylov.
Kósheniń jaıy taratyp aıtsań, kóp-kórim jyr bolar edi. Jańbyr jaýsa, sýǵa tolady. Kóshe eńiste ornalasqandyqtan, taý sýy da osy baǵytqa aǵady. Sondyqtan, aldaǵy ýaqytta qubyr salyp, sýaǵarlardy, aryqtardy jónge keltirgen lázim. Solaı istelse, qarǵyn sýdan qara jol da ezilip, buzyla bermes edi.
–Bıyl barlyq 6 kirme jolǵa asfalt salamyz. Aınalma jol jasap, avtobýs júrzigemiz. Úsh baǵdarsham ornatamyz. Merdiger kompanııa – «Kókshetaý joldary», dedi qala ákimi Amangeldi Smaıylov.
Ázirge Jubanov kóshesiniń jurty tolarsaqtan saz keship, ymyrt úıirilgende keıde jaryq, keıde qarańǵy úılerinde lajdap kún keship jatyr. Ákim aıtqan jaqsylyq qashan jarylqar eken?!
Kókshetaý qalasy
