Jannat Baqtaı onlaınǵa shaqyrady

Rýhanııat • 20 Mamyr, 2020

Jannat Baqtaı onlaın konsertke shaqyrady

«Astana Opera» YouTube arnasynda 25 mamyr kúni saǵat 20:00-de «Jannat Baqtaı onlaınǵa shaqyrady» konsertiniń premerasy ótedi. Qazaqstannyń eńbek sińirgen ártisi, «Astana Operanyń» jetekshi solısi, qazaqstandyq opera sahnasynyń juldyzy arnaıy ózine jazylǵan shyǵarma týraly jáne kompozısııanyń alǵash ret osy mýzykalyq keshte oryndalatyny týraly aıtty.

Nazerke JUMABAI

Sonymen qatar tanymal ánshi aldaǵy konsertke daıyndyq jumystarynan alǵan emosııalarymen bólisip, jobaǵa qatysqan áriptesteri jaıynda sóz qozǵady.

- Tyńdarmandardy ne kútip tur jáne olarǵa qandaı tosynsyılar ázirledińiz?

- Baǵdarlama tańdaýda men túrli aspektilerdi basshylyqqa aldym. Barlyq ártister tárizdi men de úlken mereke – uly oıshyl, aqyn ári kompozıtor Abaı Qunanbaevtyń 175 jyldyǵy qarsańynda óz mýzykalyq tartýymdy jasaǵym keldi. Baǵdarlamaǵa onyń tyńdarman qulaǵyna sińgen eń tanymal ári súıikti ánderin engizdim. Konsert aıasynda olar popýrrı túrinde oryndalatyn bolady. Teatrymyzdyń repertýarynda ulttyq klassıkanyń jaýhary – barlyq gastrolderimizde betkeustar qoıylym retinde usynylatyn A.Jubanov, L.Hamıdıdiń «Abaı» operasy bolǵandyqtan, árıne, osy operadan úzindi oryndap bergim keledi. Kópshilik nazaryna sıpaty jaǵynan halyq ánderine jaqyn keletin Ajar men Aıdardyń dýeti usynylady. Konsert onlaın formatta ótetindikten, onyń qabyldaýǵa jeńil bolýyn qaladym, sondyqtan baǵdarlamaǵa kúrdeli arııalardy engizbedim, mýzykalyq kesh repertýaryn estradalyq kompozısııalarmen túrlendirdim.

- Operalyq oryndaýshylar úshin onlaın konsert – jańa format. Siz úshin erekshelik týdyrǵan ne?

- Iá, qazir biz, mýzykanttar, óz shyǵarmashylyǵymyzdy osyndaı formatta usynyp júrmiz, alaıda sahnada óner kórsete otyryp, kórermenderdiń júzin kórýge, qoshemeti men súısingen kózqarastary arqyly olardyń alǵan áserlerin baıqaýǵa úırenip qalǵanbyz. Iаǵnı ol kezderi tikeleı kórermenmen kóńil-kúıimizben almasatynbyz. О́kinishke qaraı, áli de ónersúıer qaýymmen baılanysa almaımyz jáne qazirgi jaǵdaıda osyndaı erekshe qarym-qatynas quryp jatyrmyz. Demek, tyńdarmandarymyzdyń qalaı qabyldaǵanyn biz keıinirek pikirlerden bile alamyz. Bul jumysta eń bastysy – kórermenimizben aramyz úzilmeıdi. Mýzyka barshamyzǵa da kerek, sebebi adam bul dúnıege ánmen kelip, ánmen ótedi, ol – ómirdegi serigimiz. Biz túrli jaǵdaılarǵa tap bolamyz, ǵashyq bolsaq ta, qýansaq ta, muńaısaq ta, qamyqsaq ta, ol árqashan bizben birge. Osy konsert arqyly men halqymyzdyń rýhyn qoldaǵym keledi, ónerdi súıetin, biraq karantın kezeńinde onymen qaýysha almaı júrgen jandarǵa bir jutym taza aýadaı nár bergim keledi.

- Sizben birge osy jobaǵa kimder qatysady?

-Konsertke eki konsertmeıster – «Astana Opera» opera trýppasynyń bas konsertmeısteri Elena Sahno jáne meniń eski dosym, tanymal kompozıtor Álibı Ábdinurov qatysady. Ol meniń shyǵarmashylyq ıdeıalarymdy shyndyqqa aınaldyrady, sóıtip, ómirge jańa ánder keledi. Atalǵan mýzykalyq keshte biz solardyń birin usynamyz. Konsertimniń sońǵy kompozısııasy arnaıy men úshin jazylǵan, «Súıikti qalam» dep atalady. Álibı Ábdinurovqa osy án boıynsha jumys jasaý barysynda barlyq pikirlerim men tilekterimdi eskergeni úshin alǵysym sheksiz. Shyǵarmashylyǵymyz tyńdarman qaýymnyń kóńilinen shyǵady dep úmittenemin. Osy konsertte barlyq kompozısııalarǵa jańa dem bergim keldi, bul rette onyń kómegi ushan-teńiz.

Sahna tórine menimen birge tamasha áriptesterim – Qazaqstannyń eńbek sińirgen qaıratkeri, Italııa Juldyzy Ordeniniń Kavaleri Medet Chotabaev jáne bolashaǵynan zor úmit kúttiretin Narul Toıkenov shyǵady.

Suhbat sońynda Jannat Baqtaı óz shyǵarmashylyǵynyń jankúıerlerin onlaın konsertke shaqyrdy.

-Kóktem keldi, karantın biraz jeńildetildi, janym asqaq mýzykany qalaıdy, án qanatynda qalyqtap ushqym keledi. Qymbatty tyńdarmandarym úshin jaqsy emosııalar men qýanyshty sezimder ǵana syılaǵym keledi. Onlaında kezdeskenshe!