Jerlesimiz óziniń tusaýkeser kezdesýin 13 maýsymda AQSh-ta Melıssa Gattoǵa qarsy ótkizedi. 24 jastaǵy brazılııalyq arýdyń osy sport túrin serik etkeli tórt jyldan asty. Sol aralyqta segiz kezdesý ótkizip, alty ret jeńiske jetti. Eki básekede teń esep tirkeldi. Sońǵy ret Gatto 2018 jyldyń 28 qyrkúıeginde Karolın Roza Kavedony aıqyn basymdyqpen utty.
Al 23 jastaǵy Marııa Agapova bes jyl aralyǵynda toǵyz márte oktagonǵa shyǵyp, segiz ret jeńis toıyn toılady. Byltyrǵy jyldyń ózinde úsh jekpe-jek ótkizip úlgerdi. Jazda ol amerıkalyq Treısı Kortezden upaı sanymen utylsa, kúzde AQSh-tyń taǵy bir ókili Aleksa Konners pen brazılııalyq Marılıa Santosqa san soqtyrdy. Bul básekelerdiń ekeýi de merziminen buryn aıaqtaldy.
