Amerıka qurama shtattarynda jyl saıyn tutynýshylardan suralyp, smartfondardyń qanaǵattanýshylyq ındeksi túziledi. Kóńildegideı gadjetter sany boıynsha Apple jeńse, qurylǵylar arasynda Samsung kompanııasynyń 2018 jylǵy flagmany úzdik bolyp tanylǵan.
Saýalnamany kelisim bergen barlyq gadjet ıelerinen alǵan eken. Kóptegen adamnan óz qurylǵysyna qanshalyqty rıza ekendigi suralǵan. Appleinsider.com portalynyń habarlaýynsha, atalǵan shara byltyrǵy 15 sáýirden bıylǵy 20 naýryzǵa deıin ótkizilgen jáne oǵan 27 myń adam qatysqan.
О́ndirýshiler reıtınginde Apple ónimderine rıza klıentterdiń úles salmaǵy 82%-dy qurasa, Samsung Galaxy - 81% jáne úshinshi-tórtinshi oryndardaǵy LG men Motorola kórsetkishteri sáıkesinshe 79% jáne 77%.
Endi jekeleı smartfondar arasyndaǵy tartysqa kelsek, eń sátti gadjet bolyp Samsung alpaýytynyń 2018 jylǵy sýperqurylǵysy Galaxy Note9 tanyldy. Oǵan rıza qojaıyndar 85% bolyp otyr. Ekinshi orynda iPhone XS Max, Galaxy S9+ jáne Galaxy S10 sııaqty úsh birdeı flagman. Ol úsheýiniń ındeksi - 84%. Bir qyzyǵy, eń sońǵy shyqqan Galaxy Note10 nemese jap-jańa iPhone 11 reıtıngke múlde kirmeı qalǵan.
