Taurus World Stunt Awards – 2001 jyldan beri Los-Anjeleste ótkiziletin jyl saıynǵy kórkem fılmderdegi úzdik kórinisteri úshin álemniń úzdik trıýk sheberlerin marapattaıtyn rásim. Bul týraly jobanyń resmı saıtynda: «Taurus World Stunt Awards nazarǵa ilikpeıtin kıno keıipkerlerine, álemdegi eń úzdik trıýk jasaıtyn mamandarǵa beriledi. Olar kópshiliktiń kóńilinen shyǵatyn eń batyl amaldardy oryndaı otyryp, óz ómirlerin qaterge tigedi», – dep jazylǵan.
Syılyq birneshe sanattaǵy eń úzdik trıýkter úshin beriledi. Atap aıtar bolsaq, olardyń qatarynda: «О́rttegi eń úzdik trıýkter», «Bıiktiktegi eń úzdik trıýkter», «Kóliktermen jasalǵan úzdik jumys», «Úzdik jekpe-jekter kórinisi», «Eń úzdik arnaıy trıýkter», «Soqtyǵysy bar eń úzdik trıýkter», «Áıelder arasyndaǵy eń úzdik trıýkter» jáne taǵy da basqa atalymdar bar.
Mádenıet jáne sport mınıstrliginiń tapsyrysy boıynsha Sataifilm kompanııasynyń qatysýymen «Qazaqfılm» kınostýdııasynda túsirilgen «Tomırıs» kartınasy «Sheteldik fılmde qoıylǵan úzdik trıýkter» atalymyndaǵy marapattyń qysqa tizimine endi. Aıtýly baıqaýda qazaqstandyq fılmmen birge Reseı, Ýkraına, Italııa jáne Mysyr eliniń týyndylary da baq synaıdy.
2020 jyldyń 9 mamyryna belgilengen marapattaý rásimi koronavırýstyq pandemııaǵa baılanysty keıinge shegerilip otyr. «Júldegerler tizimi aldaǵy ýaqytta mindetti túrde jarııalanatyn bolady», deıdi joba uıymdastyrýshylary.
