Bıyl oblysta mektep bitirýshilerdiń sany – 5142 túlek boldy. Olardyń ishinde 362 túlek «Altyn belgi» ıegeri jáne 223 túlek Úzdik attestat ıegeri atandy.
Eldegi koronavırýs indeti sońǵy qońyraý saltanatynyń formatyn ózgertip jiberdi. 25 mamyr kúni 1-10 synyptar úshin sońǵy qońyraý merekesine arnalǵan onlaın-synyp saǵaty ótti. WhatsApp jelisinde ótken synyp saǵatyna ata-analar, qamqorshylyq keńesiniń músheleri, óńirdiń tanymal azamattary, ótken jyldardaǵy mektepterdiń tabysty túlekteri, elimizdiń jáne álemniń úzdik ýnıversıtetterinde oqıtyn stýdentter, bıznes ókilderi, memlekettik qyzmetkerler shaqyryldy.
Áleýmettik jelilerde «Sát sapar, jas túlek!», «Ustazdarǵa myń alǵys», «Mektep – bilim ordasy», «Kóńildi jazǵy demalys» taqyrybymen beınesıýjetter taraýda.
- 2019-2020 oqý jylynda bizdiń №47 mekteptiń 1-11 synyptarda – 2559 oqýshy, mektepaldy daıarlyq tobynda – 236, shaǵyn ortalyqta – 100 búldirshin, barlyǵy 2895 bala bilim men tárbıe aldy. Oqý jylynyń qorytyndysy boıynsha 612 oqý ozaty, 997 oqý ekpindisi bar. Bilim sapasy 63,3%-dy qurap otyr. 130-ǵa jýyq oqýshymyz qalalyq, oblystyq baıqaýlarda, bilim olımpıadalarynda júldeli orynǵa ıe bolyp, mektebimizdiń mártebesin kóterdi. Sońǵy toqsandaǵy qıyndyqtarǵa qaramastan biz oqý jylyn tabysty aıaqtadyq dep oılaımyn, - deıdi Oral qalasyndaǵy №47 mekteptiń dırektory Natalıa Erǵojıeva.
Búkil álemdi ábigerge salǵan koronavırýs indetiniń kesirinen bıyl sońǵy qońyraý saltanaty mektep qabyrǵasynda ótpedi. Biraq arnaıy bezendirilgen kólikter kóshe-kósheni aralap, sońǵy qońyraý únin taratty. Ár kóshede turatyn oqýshylar sanıtarlyq sharany saqtaı otyryp, mektep formasynda, qoldaryna shar alyp úıleriniń aldynda qarsylap turdy. Oqýshylar aldaǵy oqý jylynda sabaq úrdisi qalypty jaǵdaıǵa kóship, altyn uıa mektebiniń tabaldyryǵyn attaıtyn sátti asyǵa kútedi.
Batys Qazaqstan
