Bul joly da sol izben kólik jóndeý mamandyǵynyń qyr-syryn meńgergen maıtalmandy maqalamyzǵa arqaý etpekpiz. Ol – Qaztalov aýylynyń týmasy Erbol Idrısov. Maqalamyzdyń basyn oqyǵandar: «Oı, munyń nesi qyzyq, kásip jasap aqsha taýyp júr ǵoı» dep oılaýy da múmkin. Biraq maqalamyzdyń barysynda Erbol bul kásipti aqsha úshin emes, jeke qyzyǵýshylyǵynan jasap júrgenine kóz jetkizemiz.
Endeshe bárin basynan bastaıyq. Erbol Talapuly uzaq jyldardan beri aýdan ortalyǵyndaǵy oblystyq tótenshe jaǵdaılar departamentine qarasty №11 órt sóndirý bóliminde kólik júrgizýshi bolyp jumys isteıdi. Azamattyq qorǵaý aǵa serjanty Erbol kúndelikti qyzmetimen qatar kólik jóndeýmen aınalysady. Kólik jóndegende ekiniń biriniń qolynan jóndeý kele bermeıtin soǵylǵan, maıysqan kólikterdi qalpyna keltirýmen aınalysady. Sonyń ishinde ózi qyzmet jasap júrgen bólimniń 4 qyzmettik kóligin jóndep, áriptesteri aldynda sheber retinde tanylǵan. Retin taýyp, maqalamyzdyń keıipkerine jolyqtyq.
– Oqýshy kezimnen tehnıkaǵa óte úıir boldym.
Tehnıkaǵa degen qyzyǵýshylyǵym qazirgi mamandyǵymdy tańdaýyma sebep boldy. Men kóbine jumysta júrgen kezimde qyzmettik kólikterdi jóndeýmen aınalysamyn. Maǵan árkez áriptesterim qoldaý bildirip, kómektesip júredi. Atap aıtar bolsam, Beıbit О́tebaev, Birjan Ahmetov, Erbulan Tilekesh, Roman Qarabaevtardyń eńbegi zor. Alǵash ret bizdiń bólimdegi ÝAZ avtokóligin jóndep, jańa túske syrlap shyqtyq. Jaman bolyp shyqpaǵan sekildi. Al úıde jaqyndarymnyń kóligi bolmasa, basqa adamdardyń kóligin qaramaımyn. Bul kásip emes, qosymsha áýestigim deýge bolady. Kólik jóndep, tabys tapqan emespin, – dep aǵynan jaryldy. Erboldyń qaıta jóndegen kólikterin kórgende: «Jańa ǵana salonnan shyqqan ba?» dep oılaýyńyz múmkin.
Ol jaqynda áriptesterimen birge ZIL markaly órt sóndirý avtokóligin jańa máshınedeı jaınatyp shyǵarǵan. Jýyrda olar №11 órt sóndirý bólimi atynan oblystyq tótenshe jaǵdaılar departamenti uıymdastyryp jatqan «Úzdik jóndeý bólimi» saıysyna qatysady. Sol jerde oblys boıynsha arnaıy tehnıkany jaqsy kútip ustaǵan bólim marapattalatyn bolady. Al bizdiń keıipkerimizdiń sheberligi sol jerde joǵary baǵaǵa ıe bolary sózsiz.
Qaırat JAQYP
Batys Qazaqstan oblysy,
Qaztalov aýdany
