Keı kásiporyndarda vırýs jappaı taralǵan
«Keshe koronavırýs jaǵdaıyna baılanysty Úkimette vedomstvoaralyq komıssııanyń otyrysy ótti. Jalpy elimizde qazir 9300-den astam adam koronavırýs juqtyrǵan. Olardyń jartysy, ıaǵnı 4600-den astamy indetten emdelip shyqty. О́kinishke qaraı, 37 adam qaıtys boldy. Qazirgi ýaqytta 4653 naýqas emdelýde, olardyń arasynda 355 bala bar», degen mınıstr naýqastardyń 85%-nyń jaǵdaıy jeńil deńgeıde ekenin habarlady. Iаǵnı olardyń kóbi sımptomsyz tirkelgen.
Elimizdiń bas dárigeri ótken 2 aptada kúndelikti ósim deńgeıi 5 paıyzdan aspaǵanyn, biraq keı óńirde koronavırýs juqtyrǵandardyń artqanyn atap ótti. Ásirese úlken kásiporyndarda jappaı juqtyrý jaǵdaıy anyqtalǵan. «Atyraý, Qaraǵandy, Almaty, Jambyl, Qostanaı, Túrkistan, Batys Qazaqstan oblystary jáne Shymkent qalasynda ósim baıqalady», dedi E.Birtanov.
Naýqastardyń 70%-y sımptomsyz tirkelgender
Mınıstrdiń aıtýynsha, vırýs juqtyrǵandardyń 15-16%-ynda ǵana aýrý belgileri bolǵan. Al 70%-y sımptomsyz tirkelgen. Munyń barlyǵy jappaı testileýdiń nátıjesi ekenin aıtqan E.Birtanov: «Bul naýqastardy tabý úshin Densaýlyq saqtaý mınıstrligi jergilikti ákimdiktermen birlesip profılaktıkalyq skrınıngtik jumystaryn júrgizip jatyr. Prezıdenttiń tapsyrmasymen qazir skrınıngtiń kólemin táýligine 25 myń testke arttyrdyq. Jalpy osy epıdemııa bastalǵannan beri elimizde 711 myń test jasaldy. Olardyń 260 myńnan astamy, ıaǵnı 40%-y profılaktıkalyq skrınıng dep aıtýǵa bolady», dedi Densaýlyq saqtaý mınıstri.
Alaıda test arqyly aýrýy anyqtalyp, esh sımptomy baıqalmaǵan keıbir azamattar aýrýhanaǵa jatýǵa kónbeı jatqan kórinedi. Al mundaı naýqastardyń vırýs tasymaldaýshy ekenin aıtqan mınıstr: «Sımptomsyz naýqastar basqalarǵa ınfeksııany juqtyrýy múmkin. Buryn biz olardy aýrýhanaǵa jatqyzǵanbyz. Qazir múmkindik bolsa, úılerinde nemese arnaıy karantındik stasıonarlarǵa jatqyzyp, basqa adamdardan bólekteýimiz qajet. Keıbir memlekette bul naýqastar jalpy statıstıkaǵa kirmeıdi. Bizdińshe bul durys emes. Qazaqstandaǵy tártip boıynsha barlyq naýqasty esepke alamyz», dedi.
Maska taǵý óte mańyzdy
Halyqaralyq jáne otandyq sarapshylardyń pikirinshe, pandemııa áli aıaqtalǵan joq, tolqyndy jaǵdaımen kele jatyr. Iаǵnı karantındik jaǵdaıda tómen túsedi, biraq shekteý sharalaryn toqtatsa qaıtalanady. Osyny aıtqan spıker Qazaqstanda ǵana emes, dúnıe júzinde osyndaı qaýipti jaǵdaı saqtalyp otyrǵanyn atap ótti.
«Pandemııany toqtatý úshin ár memleket, ár azamat karantındik-sanıtarlyq sharalardy engizýi jáne saqtaýy qajet. Birinshiden, jumys ornynda jáne syrtqa shyqqanda 2 metr qashyqtyqty saqtaý qajet. Sondaı-aq epıdemııany toqtatý úshin qazirgi ýaqytta maska taǵý óte mańyzdy. Odan keıin jeke gıgıena. Aýrý tek qana aýamen emes, qol arqyly da juǵýy múmkin. Sondyqtan qol jýý da óte mańyzdy másele bolyp tur», dedi E.Birtanov.
Qashyqtan jumys istegen tıimdi
«Kóp naýqas jumys ornynda aýyrǵandyqtan qazir biz bas sanıtarlyq dárigerdiń qaýlysymen jumys oryndaryndaǵy azamattardyń sanyn azaıtýymyz qajet. Múmkindik bolsa, ınternet arqyly qashyqtan jumysqa kóshýimiz kerek. Mysaly, keńse qyzmetkerleriniń 50%-y qashyqtan jumys isteýi tıis. Azamattar arasynda qashyqtyq saqtalsa, ınfeksııanyń taralýy toqtaıdy. Keı kásiporyn vahtalyq rejimde jumys isteıtindikten, mundaı shekteý engizý qıyn. Sondyqtan bul kásiporyndar óte qatań sanıtarlyq jáne dezınfeksııalyq sharalardy qabyldaýy tıis», dedi Densaýlyq saqtaý mınıstri.
«Sońǵy aptada reıd júrgizdik. Kóptegen kásiporynda sanıtarlyq sharalar qabyldanbaǵan. Bul – halyqtyń densaýlyǵy úshin qaýipti. Úkimettiń vedomstvoaralyq komıssııasynyń sheshimimen sanıtarlyq sharalardy engizý jáne ony saqtaýǵa mán beriledi. Saqtyq sharalaryn qatań ustansaq qana ınfeksııany toqtata alamyz», dedi vedomstvo basshysy.
Sondaı-aq mınıstr elimizde der kezinde aldyn alý sharalary júrgizilip, tótenshe jaǵdaıdyń qabyldaýyna baılanysty indetke shaldyqqandar men qaıtys bolǵandardyń sany edáýir az bolǵanyn eske saldy. «Sońǵy eki aıdyń ishinde elimizde joǵary deńgeıde karantın rejimi saqtaldy. Bul, árıne, barlyǵymyzǵa ońaı bolǵan joq. Ol ekonomıka men áleýmettik ómirge qatty áser etti. Turǵyndardyń aýyzbirshiligi men saqtyq sharalary arqyly elimizdegi indet jaǵdaıy baqylaýda dep aıtýǵa bolady. Sebebi basqa eldermen salystyrǵanda bizde naýqastar sany men qaıtys bolǵandar sany kóp emes», dedi ol.
