Brıfıngte, eń aldymen, qaýipsizdik sharalary boıynsha jergilikti atqarýshy organdar, polısııa departamenti jáne Ulttyq ulannyń 6506 áskerı bólimimen birlesken jumys júrgizilip jatqany aıtyldy.
«Sý obektilerinde jáne sý sharýashylyǵy qurylystarynda buqaralyq demalys, týrızm jáne sport úshin arnaıy oryndar anyqtaldy. Qazirgi ýaqytta Shymkent qalasy ákimdiginiń «Shymkent qalasy sý nysandary men sý sharýashylyǵy qurylystarynda buqaralyq demalýǵa, týrızm men sportqa arnalǵan oryndardy belgileý týraly» Qaýlysynyń jobasy daıyndaldy. Iаǵnı, qaladaǵy barlyq 5 demalys orny nysandardy bekitý boıynsha qaýly jobasyna engizilgen», – dedi E.Bahaev.
Odan bólek, Erǵalı Jarasbekuly tótenshe jaǵdaı engizilgen kezde sý aıdyndarynda jazataıym oqıǵalardyń bolmaýy úshin halyq arasynda belsendi úgit-nasıhat jumystary júrgizilip otyrǵanyn jetkizdi. Osy maqsatpen 30 tyıym salatyn belgi, 59 úgit stend jáne 3 bılbord ornatylyp, arnaıy 5 beınerolık daıyndalǵan.
Baspasóz májilisinde E.Bahaev qaýipsizdik sharalary boıynsha arnaıy memorandým jasalyp otyrǵanyn da aıtyp ótti.
«2019 jyly demalys oryndarynyń ıelerimen az qamtylǵan otbasy balalaryn tegin oqytý boıynsha 9 memorandým jasalyp, sýǵa shomylý maýsymynda 376 bala oqytyldy. 2020 jylǵa arnalǵan memorandýmdar jasaý boıynsha aýdan ákimdikterimen jumystar júrgizilýde» – dedi ol.
Brıfıng barysynda departamenti basshysynyń orynbasary BAQ ókilderiniń suraqtaryna jaýap berip, Shymkent qalasynda byltyr sý aıdyndarynda adamdardyń qaza bolýyna baılanysty jazataıym oqıǵa tirkelmegenin aıtty.
