Býrabaıǵa sapar shekkender arasynda Iаroslava Shvedova, Elena Rybakına jáne Zarına Dıas syndy sheberler bar. Bul oıynshylardyń barlyǵynyń da esimi jankúıerlerge jaqsy tanys. Máselen, kezinde álemdik reıtıngte 25 satyǵa jaıǵasqan 32 jastaǵy Shvedova juptyq jarysta Ýımbldon men AQSh-tyń ashyq birinshiliginde jeńimpaz atandy. Jekelegen saıysta «Úlken dýylǵa» sanatyndaǵy týrnırlerdiń shırek fınalyna deıin jetti.
26 jastaǵy Dıas qatarynan eki márte Ýımbldonnyń tórtinshi kezeńinde óner kórsetti. Osydan birer jyl buryn úzdikter tiziminde 31 oryndy enshilegen ol bul kúnderi 64 satyǵy taban tiredi.
Al 20 jastaǵy Elena Rybakınanyń qazirgi qarqyny tipten kúshti. Byltyrǵy jyldyń shilde aıynda alǵashqy júzdikke engen ol bıyl birqatar dúbirli dodalarda tabysty óner kórsetip, álemdik reıtıngte 17 orynǵa kóterildi. Elenaǵa deıin osy sport túrin serik etken birde-bir jerlesimizge bul beles baǵynbaǵan edi. Mine, osyndaı has sheberlermen birge jattyqqan jas tennısshilerdiń de sheberlik deńgeıi ósetini sózsiz.
Eki aptaǵa sozylatyn Býrabaıdaǵy oqý-jattyǵý jıynynan keıin qazaqstandyq tennısshiler álemniń ár qıyrynda ótetin birqatar halyqaralyq dodalarǵa qatysýdy josparlap otyr.
