Sonyǵa soqpaq salý qaıdan ońaı bolsyn, bir kezde Nur-Sultan qalasyndaǵy shaǵyn ǵımaratty jaldap alǵan olar daıyn ónimdi satýmen de aınalysyp kórdi. Árıne bul kásiptiń jeńil túri. О́timdisin tańdap alyp, bir jerden ákelip, ekinshi jerge satasyń. Bar jumys osymen ǵana shekteledi. Tabys bolǵanymen, taǵylymy qanaǵattandyra qoımady. О́z ónimderin shyǵarǵan áldeqaıda artyq emes pe? Qazaq balasy buryn da jalań aıaq júrgen joq qoı. El ishindegi qoly epti sheberler aıaqkıimniń neshe atasyn tikken. Tek atadan mura bolyp kele jatqan sol óner keńes zamanynda umytyldy. Burynǵy bardy qaıta jańǵyrtsa nesi aıyp? Osyndaı oıǵa kelgen soń, seriktestik basshysy 2010 jyly jeke seh ashýǵa sheshim qabyldady.
Sóıtip «SAMHAT» seriktestigi Aqmol aýylyna kóship, jergilikti bıznestiń órisin keńeıtýge bel baılady. О́zgeshe tyń ıdeıamen kásibin órge júzdirmek bolǵan kásipkerdi oblys jáne aýdan basshylyǵy qoldaı ketti. 2013 jyly 1,2 gektar jer telimi men 1200 sharshy metr garaj ǵımaraty bólindi. Jóndeý jáne jabdyqtaý jumystarynan keıin kásiporyn tolyq qýatpen jumys isteı bastady. Máselen, 2015 jyldyń on bir aıynda ǵana 800 mln teńgeniń 100 myń jup aıaq kıimi talǵampaz tutynýshyǵa usynyldy. Sol-aq eken, aty dúrkirep shyǵa bastady. Kásiporyn negizinen qorǵanys salasynyń memlekettik tapsyrysyn oryndady. Birtindep jumys aýqymyn keńeıtýge múmkindik týyp otyr.
Aıaqkıimniń sapasy eń aldymen shıkizatqa baılanysty. Bul arada búgingi tutynýshynyń talǵamyn ábden eskergen durys. Qazir bul saladaǵy ozyq úlgige kóz qanyqtyryp, sapasyn salystyryp baǵalaı biletin adamdardyń talǵamynan shyǵý da ońaı-ospaq sharýa emes. Ol úshin qapysyz sheberlik qajet-aq. Sheberler óndiriste tabıǵı terini paıdalanady. Bul ekologııalyq jaǵynan taza ónim. Dál osy arada elimizde shıkizattyń bul túriniń kádege aspaı jatqanyn, ekpin túsirip aıta ketken lázim. Jeńil ónerkásiptiń joly bolmaı jatqandyqtan, elimizdegi mal sharýashylyǵynyń asa baǵaly ónimi – teri tekke shirip jatyr. «SAMHAT»-tyń tájirıbesimen-aq jer-jerde osyndaı jumys uıymdastyrylsa, ózimizdi ózimiz ádemi de sapaly aıaqkıimmen qamtamasyz eter edik. Shetten kelgen buıymnyń barlyǵy birdeı sapaly dep aıtýǵa aýyz barmaıdy. Keıbireýi ártúrli teri aýrýlaryna sebep bolyp jatqany da jasyryn emes. Osy turǵydan kelgende «SAMHAT» aıaqkıim fabrıkasynyń qadamy quptarlyq-aq.
Qazir fabrıka ónimin jalpaq jurt jaqsy tanyp qalǵan. «SAMHAT» shyǵarǵan aıaqkıimderdiń sapaly ekeni eshqandaı jarnamasyz-aq kórinip tur. Fabrıka basshylyǵy da eń aldymen joǵary sapaly ónim óndirýge, jańa tehnologııalardy óndiriske batyl engizýge ári kezeń-kezeńimen jańǵyrtyp otyrýǵa kóp kóńil bóledi. Ol úshin, árıne, jańa joǵary tehnologııany qoldanarlyq tolaıym qurylǵylar qajet.
Bul aradaǵy basty maqsat – aldymen adam densaýlyǵyna kóńil bólý. Qoldanylǵan shıkizattyń sapasy gıgıenalyq talapqa tolyq jaýap bergeni jón. Onyń ústine aıaqqa jaıly bolýy qajet, kóńil bólý uzaq kıiske shydaǵany durys. Osyny eskere otyryp, shıkizattyń barlyq túri qatań baqylaýǵa alynyp, sertıfıkaty barlary ǵana kádege jaratylady.
– Aıaqkıim tigý – kúrdeli jumys, – deıdi seriktestiktiń bas dırektory Samal Tileýbaeva, – tutynýshylardyń kádesine jaratý bar da, básekelestikke tótep berý bar ǵoı. Sondyqtan biz óz ónimderimizdiń minsiz bolýyn qalaımyz.
Fabrıka tolyq qýatynda jumys istegen kezinde 150 adamdy jumyspen qamtý múmkindigine ıe bolady. Ázirge keıbir mamandardyń joqtyǵy qolbaılaý bolyp otyr. Máselen, tehnolog, mehanık, tiginshi tárizdi birneshe mamandyq boıynsha maman qajet. Jumys istep júrgen adamdardyń kásibı sheberlikterin jetildirý óz aldyna bir másele. Fabrıka búgingi tańda erler jáne áıelder aıaqkıimin, áskerı-kúshtik qurylymdarǵa, jumysshylarǵa arnalǵan aıaq- kıim shyǵarady.
Ynta bolsa, ońynan oralmaıtyn sharýa joq. Otandyq ónimniń asyǵyn alshysynan túsiretin osyndaı qadaý-qadaý qajyrly qareket qoı, shirkin!
Aqmola oblysy
