Konkýrs Qazaqstan Respýblıkasynyń Mádenıet jáne sport mınıstrliginiń qoldaýymen, Batys Qazaqstan oblysy ákimdigi, oblystyq mádenıet basqarmasynyń usynysymen Ǵ.Qurmanǵalıev atyndaǵy oblystyq fılarmonııasynyń uıymdastyrýymen 27 sáýirde jarııalanǵan bolatyn. О́tinishterdi qabyldaý 27 mamyrda aıaqtaldy.
– Konkýrstyń maqsaty – dúnıejúzi boıynsha jáne elimizde jarııalanǵan karantın ýaqytynda halyqtyń eńsesin kóterý, tól aspabymyz – dombyraǵa degen qyzyǵýshylyqty arttyryp, jastar arasynda oń kózqaras qalyptastyrý. Dáýletkereıdiń kúılerin halyqqa keńinen nasıhattap, elimizdiń túkpir-túkpirindegi dombyrashylardyń repertýaryn baba kúılerimen tolyqtyrý. Bir aı ishinde elimizdiń ár túkpirinen konkýrsqa qatysýǵa nıet bildirgen 105 qatysýshynyń ótinishi qabyldandy. Qazylar quramy úmitkerlerdiń joldaǵan beınejazbalary boıynsha oryndaý sheberlikterine, kúıdiń tarıhyn jetkize bilýleri, artıstızm jáne vıdeonyń sapaly túsirilýi boıynsha baǵa berdi, – dedi Ǵ.Qurmanǵalıev atyndaǵy fılarmonııa dırektory Ashat Qajyǵalıev.
Baıqaýǵa Qazaqstannyń eńbek sińirgen qaıratkeri, Mahambet atyndaǵy syılyqtyń ıegeri, professor, Qurmanǵazy atyndaǵy Qazaq ulttyq konservatorııasynyń ustazy Karıma Saharbaevanyń tóraıymdyq etýimen QR eńbek sińirgen qaıratkeri, «Parasat» ordeniniń ıegeri, professor, dırıjer Aıtqalı Jaıymov, Qazaqstannyń eńbek sińirgen qaıratkeri, Memlekettik «Daryn» jastar syılyǵynyń laýreaty Batyrjan Myqtybaev, Eńbek sińirgen qaıratkeri, dombyrashy Orynbaı Dúısenov, Mádenıet salasynyń úzdigi, Memlekettik «Daryn» jastar myılyǵynyń laýreaty, «Qurmet» ordeniniń ıegeri Erkin Nurymbetovter tórelik etti.
Qazylar alqasynyń sheshimimen almatylyq Tańat Sádenov onlaın baıqaýdyń gran-prıin jeńip aldy. Birinshi oryn qos dombyrashyǵa berildi. Ony da almatylyq dombyrashylar Erasyl Ádilbekov pen Aqylbek Bektasov ıemdendi.
Nur-Sultan qalasynan Ánel Bekenova, Almaty qalasynan Jaqsylyq Ajmuhanov jáne qyzylordalyq Abylaıhan Sqaqovtar – júldeli ekinshi oryndy qanjyǵalady.
Úshinshi orynnyń júldesine Nur-Sultan qalasy atynan qatysqan Estaı Aıtqulov (Nur-Sultan qalasy ákimdiginiń Memlekettik akademııalyq fılarmonııasy), atyraýlyq Nazerke Bazarbaeva jáne oraldyq Ańsar Berdiǵalıev laıyq dep tanyldy.
Sondaı-aq pavlodarlyq Serik Syzdyqov, shymkenttik Shyńǵys Isaev, Nur-Sultan qalasynan Toǵjan Úmbet, Almaty oblysy M.Túımembaev aýylynyń dombyrashysy Maqsat Hasanov jáne Jambyl oblysynan qatysqan Panabek Ahmetovter dıplomant atandy.
Oral qalasynan Berik Shaımardanov «Kúı tarıhyn asha bilgeni úshin» nomınasııasymen, Qyzylorda oblysy Qazaly aýdanynan Qýanysh Rahmet «Kórermender kózaıymy» atalymymen marapattaldy. Qazaqtyń ulttyq aspaby – dombyrany meńgerip, nasıhattaǵany úshin atyraýlyq Masters Sabına Ǵ.Qurmanǵalıev atyndaǵy oblystyq fılarmonııasynyń «Arnaıy júldesi» syılyǵymen marapattalady.
