"Jaqynda Ult rýhanııatynyń kósemi Ahańnyń týǵan jeri (Qostanaı oblysy Jangeldi aýdany) Aqkólge baryp qaıttym. Ahańnyń kindik qany tamǵan Sarytúbektegi úıine de kirýdiń sáti tústi. Osydan on shaqty jyl buryn sol jerdegi Aqkól, Qarasý aýyldarynyń turǵyndary asar jasap, Sarytúbektegi Ahań týǵan úıdi qalpyna keltirgen bolatyn. Qarasý aýylynyń turǵyndarymen pikirlestik. Ahańnyń urpaqtary biraz ókpe-renishterin aıtty. Ahmet Baıtursynulynyń asa kóp nasıhattalmaı júrgenin, Alty Alashtyń muńyn joqtaǵan Ahańnyń qazir tek Úmbeteı rýyna ǵana qajet bop qalǵanyn ashyna jetkizdi. Rasynda da biz óte naýqanshyl bop kettik, ulylarymyzdy tek mereıtoı qarsańynda ǵana esimizge alyp, jaıshylyqta múlde eskere bermeımiz", - deıdi Aıbek aqyn.
2022 jyly qazaq ádebıeti men ádebıettaný ǵylymynyń, til biliminiń atasy jáne reformatory Ahmet Baıtursynulynyń 150 jyldyq mereıtoıy bolmaq. Aıtys aqynynyń aıtýynsha, osy bir aıtýly kúni toı da, aıtys pen báıge de uıymdastyrylýǵa tıis. Sporttyq sharalar men ǵylymı konferensııalar da ótýi múmkin. "Biraq toıdan qalar bir belgi bolýy kerek", - degen oı kópshilikti mazalaıtyn kórinedi.
"Aýyl turǵyndarymen pikirlese otyryp, solar aıtqan úsh máseleni ortaǵa salǵym kelip otyr. Birinshi, Ahańnyń Sarytúbek degen jerdegi kindik qany tamǵan týǵan úıin sol jerdegi Aqkól, Qarasý aýylynyń turǵyndary asar jasap, óz qarajattaryna qalpyna keltirgen bolatyn. Biraq sol úıdiń qazirgi qalpy kóńil kónshitpeıdi. Arhıtektor azamattar sol Sarytúbektiń týrıster men zııarat etýshilerdiń kelýine laıyqtap eskız-maketin daıyndap otyr. Bul – árıne, qarjyny qajet etedi. Sarytúbektiń dál janynda Ahańnyń atasy Shoshaqtyń, ákesi Baıtursynnyń jáne anasynyń zıraty tur. Ol zıratty da aýyl turǵyndary qorshaý jasap kútimge alǵan. Endi osy jerdi abattandyryp, Ahań týǵan úıdi qalpyna keltirip, janyna qonaq kútetin úı men shaǵyn murajaıy ashylsa", - deıdi aqyn arqalaǵan amanattyń artyndaǵy aǵaıyn.
Ekinshi usynysynda Ahań týǵan Sarytúbekti, aıdyndy Aqkóldi kórýge jáne zııarat etýge keletin halyqtyń kóptigine baılanysty jol máselesin sóz etken. "Aqkól aýylyna baratyn 100 shaqyrymdyq jol Ahańnyń ómir joly sııaqty azapqa toly, - dep ashynǵan aqyn: - Ásirese, kóktem men kúz aılaryndaǵy jaýyn-shashyn kezinde jol múlde ezilip ketedi, al qystaǵy boranda aptalap ashylmaı jatady. Aýdan ákimshiligi qansha qarjy quıǵanymen, kóterme jol betinde asfalty bolmaǵasyn jaýyn-shashynda júrýge jaramaı qalady. Byltyrǵy Naýryzda Elordadan kelgen laýazymdy kisilerdi aparamyn dep jarty joldan batpaqqa batyp, qaıtyp kelgenmin. Ahańnyń 150 jyldyǵynda osy 100 shaqyrym jolǵa asfalt tóselse, Ahańnyń kindik qany tamǵan úıine týrıster men zııaratshylardyń kelýine mol múmkindikter týdyrar edi", - deıdi.
Osylaısha, ol aımaqtaǵy tarıhı nysandar men kıeli oryndardan bólek el ishindegi týrızmniń artýyna da ózindik septigi tıer edi degen úmit otyn qozǵaıdy. Eger jol jaǵdaıy jaqsarsa, Qaratuzdaǵy shıpaly sý men Tenteksaıdaǵy emdik qasıeti bar ystyq sýǵa da kelýshiler qarasy artpaq. Sondaı-aq jazba avtory qazirgi Qostanaı oblysy Jangeldın aýdanyna Ahmet Baıtursynulynyń esimin berý kerek degen usynys tastap otyr.
"Torǵaı jurtshylyǵy da, jalpy Alashshyl zııaly qaýym da Ahańnyń 150 jyldyq mereıtoıynan úlken bir ózgeristi, Osy Jangeldın aýdanynyń esimin Ahańnyń atymen ataýdy kútip otyr. Árıne, Álibı Jangeldınniń de eleýli eńbegi bar shyǵar, biraq salystyrmaly túrde Ahańnyń eńbegi basym ekendigi daý týdyrmaıdy. Jangeldınniń esimi keńes zamanynda nasıhattaýdan kende bolǵan joq. Qazaqstannyń qaı tukpirine barsańyz da Jangeldınniń atyndaǵy aýyl, joq degende mektep pen kóshe ataýyn mindetti túrde kezdestiresiz. Sondyqtan, buǵan Álekeńniń rýhy da razy bolady dep oılaımyz", - delingen aqynnyń jazbasynda.
