Halyqaralyq Olımpıada kúnine oraı Qazaqstan Ulttyq Olımpıadalyq komıteti birneshe baǵdarlama uıymdastyrady. Koronavırýs pandemııasyna baılanysty barlyq shara onlaın formatta ótedi.
"Bıyl belgili sebepterge baılanysty Olımpıada kúnin merekeleý onlaın rejıminde ótedi. Tek qana bizde emes, búkilálem boıynsha merekeni onlaın formatta atap ótedi. Osyǵan oraı, Qazaqstan UOK eki aptalyq ınteraktıvti onlaın-marafon uıymdastyrady jáne atalmysh bastamany barlyq qazaqstandyq qoldaıdy dep senemiz. COVID-19 pandemııasy kezinde bizdiń negizgi mindetimiz – sport degenniń siz ben bizden turatynyn, salaýatty ómir salty men jarqyn bolashaq ekenin eske salý. Qazirgi tańda álem boıynsha kún tártibinde sport tustastyǵy máselesi basty orynda tur. Olımpıadalyq jáne joǵary jetistikter sportty buqaralyq sporttan, sonyń ishinde, balalar sportynan bólip jarýǵa bolmaıtynyn túsiný kerek. Chempıon bolý balalyq shaqtan bastalady. Biz búgin Olımpıadashylarymyzben birge bolashaq chempıondarǵa kóńil bólemiz", - dep atap ótti Qazaqstan UOK bas hatshysy Andreı Krıýkov.
Bas hatshynyń sózinshe, Olımpıada jeńisine degen qushtarlyq balalardyń kishkentaı kezinen bastalady. Balalyq shaqtan jeńiske degen qulshynys oıanyp, Olımpıadashynyń negizi qalanady. Máselen, barlyq Olımpıada chempıony nemese júldegerlerin alyp qaraıtyn bolsaq, olar kishkentaı kezderinen sportshy bolýdy, jeńiske jetýdi qalaǵan. Olardyń bala armandary oryndalyp, úmit pen senimi ushtasyp jeńiske jetelegen. Erinbeı eńbek etken sátteri týraly únemi, úzdiksiz maqtanyshpen aıtýǵa bolady.
Olımpıadalyq sport túrlerinen ulttyq qurama komandalaryn daıyndaıtyn Qazaqstan UOK Olımpıada kúni taqyrybyn osyǵan arnaıdy.
"Bala armany adamdy eshqashan aldamaıdy, adastyrmaıdy. Kishkentaı kezimnen sportshy, sonyń ishinde jeńimpazdar qatarynan tabylǵym keletin. Balalar arasynda alysyp oınap júrgende-aq jeńilý shamyma tıetin. Aýladaǵy kez kelgen bıik tuǵyrdy jeńis tuǵyryna balap, ózimdi kásibı sportshy retinde elestetetinmin. Osylaısha, sport - meniń bir bólshegime aınaldy. Mendegi kirshiksiz senim ómirime jaryq sáýle shashyp, jol siltep, úlken sportqa alyp keldi. О́skende kim bolǵyńyz keletinin sheshe almasańyz, bir sátke balalyq shaǵyńyzǵa kóz tastap, armanyńyzǵa erik berip kórińiz. Maǵan senińiz, túısik aldamaıdy. Osyndaı bala armannyń jeteginde sportqa sanaly túrde kelgenimdi eshqashan jasyrmaımyn. Sondyqtan, bizge qarap kimde kim ómirin sportpen baılanystyrǵysy kelse, men úshin óte qýanyshty jaǵdaı bolatyn edi", - deıdi Eldos Smetov.
"Biz, Olımpıadashylar óskeleń urpaq, jas sportshylar úshin úlgi ekenimizdi óte jaqsy túsinemiz. Olımpıada kúni - sportqa endi qadam basqan jas býyn, jankúıerler men janashyrlarymyzben tildesýge taptyrmas kún. Bizdiń kezdesýimizden keıin kishkentaı búldirshenderdiń sportqa qyzyǵýshylyǵy oıanyp, sportpen ómirin baılanystyratyndar sany arta túsedi dep oılaımyn. Sebebi, sport myqty bolýǵa, eńbekqor, tabandy jáne de eń bastysy densaýlyǵynyń jaqsy bolýyna kómektesedi emes pe?!" - deıdi Olımpıada chempıony Dmıtrıı Balandın.
Olımpıada kúnin toılaý aıasynda balalar arasynda sýret salý baıqaýy ótedi. Sonymen qatar, YouTube jelisinde ataqty sportshylarmen onlaın jattyǵý ótkiziledi. UOK pen IýNESKO-nyń birlesken jobasy barysynda Olımpıada chempıondary men erekshe balalar arasynda kezdesý uıymdastyrý da josparlanǵan.
Sonymen qatar biz #teamKZ jankúıerlerine áleýmettik jelilerdi muqııat qadaǵalap otyrýǵa keńes beremiz. Onda UOK-tyń estelik syılyqtaryn jeńip alýǵa bolatyn birqatar vıktorına bastalady. Vıktorına 23 maýsymǵa deıin jalǵasady.
Elimizdiń olımpıadalyq otbasy atalǵan merekege belsendi qatysýǵa jáne jahandyq olımpıadalyq qozǵalysqa qosylýǵa shaqyrady. Biz úlken sport árqashan kishkentaı jeńisterden, bolashaq jas chempıondardyń jeńisterinen bastalatynyn umytpaýymyz kerek.
