Kınotýyndyda bizdiń zamanymyzǵa deıingi VI ǵasyrdaǵy uly daladaǵy alyp bıleýshilerdiń taǵdyrly tartysy sýretteledi. Fılmde kishkentaı qyzdan erjúrek jaýyngerge aınalǵan, jaqyndarynan aıyrylyp, satqyndardan óshin alǵan jáne saq taıpalaryn biriktirgen aty ańyzǵa aınalǵan Tomırıs patshaıymnyń taǵdyry baıandalady. Fılm Mádenıet jáne sport mınıstrliginiń tapsyrysymen «Qazaqfılm» kınostýdııasynda Sataifilm kompanııasynyń qatysýymen túsirilgen.
«Bul epıkalyq fılm tańǵajaıyp peızajdarmen kórkemdelip, joǵary sapada túsirilgendikten kórermenderdi birden baýrap alatyny sózsiz», dep jazdy Variety basylymy.
«Tańǵajaıyp oqıǵalardy biz erekshe unatamyz. Sondyqtan da alǵashqy tarıhı «Amazon patshaıymynyń» qupııaǵa toly oqıǵasy basqalarǵa qaraǵanda senimdirek», dedi Well Go USA Entertainment prezıdenti jáne atqarýshy dırektory Dorıs Pfardresher Hollywood Reporter tilshisine.
Al kınotýyndyny tamashalaǵan amerıkalyq sarapshylar fılmniń kórkemdik kelbetin aıryqsha baǵalap, kórermen kózaıymyna aınalatyn týyndy dep baǵalap otyr. – Qazaqstandyq jáne amerıkalyq kınoprodıýser, Qazaqstannyń Los-Anjelestegi qurmetti konsýldyǵynyń basshysy Gııa Nurtas bizdi osy arnaıy jobamen tanystyrǵan kezde, fılmniń keremet áleýetin birden baıqadyq. Well Go USA kompanııasy Tomırıs patshaıymy týraly osy bir tamasha týyndyny bizge jetkizýge daıyn ekendigine óte qýanyshtymyz, – deıdi olar.
