Konkýrstyń taqyryby 2020 jylǵy Olımpıada kúniniń uranymen birdeı – "Olımpıada balalyq shaqtan bastalady". Bolashaq Olımpıada jeńisteriniń irgetasy bala kezden qalyptasady.
"Olımpıada chempıony bolyp týylmaıdy, Olımpıada chempıony bolyp qalyptasady. Basty maqsatymyz – jastarǵa osy baǵytty túsindirý. Eńbekqorlyq, tózimdilik jáne óz maqsatyna umtylý arqyly úlken jeńister men Olımpıada júldelerine qadam basýǵa bolady. Olımpıada chempıondary men sportshylardyń ómirlik joly óskeleń urpaqqa jarqyn úlgi ekeni anyq. Olardyń jeńiske degen jigeri men el dańqyn asqaqtatý jolyndaǵy eńbegi sport arqyly bala armandy oryndaýǵa bolatynynyń dáleli. Dál osy maqsat arqyly elimizdegi talantty sýretshiler men ónerge jáne sportqa yntyq jandardy olımpıadalyq qundylyqtardy dáripteýge shaqyramyz. Olımpızm qundylyqtaryn tanyta túsý úshin qazirgi tańdaǵy tanymal kóshe óneri (strıt-art) jáne mýral tańdalyp otyr. Konkýrs arqyly elimizdegi sýretshilerge qoldaý kórsetý de kózdelýde", - dep atap ótti Qazaqstan UOK.
Konkýrsqa kez kelgen adam qatysa alady. Tolyǵyraq www.olympic.kz saıtynda. Jeńimpaz 21 maýsym kúni Ulttyq Olımpıadalyq komıtettiń resmı saıtynda ashyq daýys berý arqyly anyqtalady. Qoldanýshylar 17 eńbektiń ishinen eń úzdigin tańdap alady.
Jeńimpaz ben eki júldeger úshin demeýshiler qundy syılyqtar daıyndaýda. Ákimdiktermen kelisilgen soń jeńimpazdyń eńbegi jarııalanatyn úı qabyrǵasy tańdalady. Osylaısha, qazaqstandyq qalalardyń birinde tarıhta alǵash ret olımpıadalyq mýral paıda bolady.
