Qazaqstandyq jas mýzykant óziniń 24 mamyrda ótken tikeleı efıri kezinde Brazılııa týraly tilge tıek etken bolatyn. Dımashtyń ákesi Qanat Aıtbaev ta Latyn Amerıkasynda konserttiń aldaǵy ýaqytta ótý múmkindigin jetkizdi:
"Osyǵan deıin Latyn Amerıkasyna konsertter berý jóninde usynystar aldyq. Alaıda, koronavırýs ınfeksııasy pandemııasyna baılanysty keıinge qaldyrýǵa týra keldi. Karantın aıaqtalǵan kezde uıymdastyrýshylar bizge naqty usynystarymen shyǵýy múmkin, biz árıne, muny eskeretin bolamyz. Latyn Amerıkasynda konsertter berý biz úshin de qyzyq", dedi Q. Aıtbaev.
Brazılııalyq Dears ta Latyn Amerıkasynyń Dımashtyń kelesi týryna iligetinine nyq senimdi. О́ıtkeni, Brazılııadaǵy Dımashtyń fan-klýby kún sanap tanymal bolyp keledi, tipti, qazaqstandyq oryndaýshynyń álemdegi fan-klýbtary arasynda da tanymal bolyp úlgergen.
Dımashtyń Brazılııadaǵy fan-klýby (DKFCB) 24 mamyrda Brazılıa qalasynda ánshiniń týǵan kúnin atap ótý maqsatynda kezdespek bolǵan. Tipti, arnaıy baǵdarlama da jasaqtalǵan eken. Múmkindigi shekteýli balalardy mýzykaǵa oqytý úshin qarjy jınaýdy da josparlapty. Alaıda, COVID-19 pandemııasyna baılanysty qaıyrymdylyq aksııasyn keıinge qaldyrýǵa týra keldi.
Fan-klýb Shyǵys Eýropadan ákelingen Dımashtyń qoltańbasy bar zattardy satý arqyly 3.100,00 brazılııalyq real (~250 myń teńge) jınaǵan. Ol qarajat az qamtylǵan otbasylarǵa bir tonna azyq-túlik jáne tazalyq quraldaryn alýǵa jumsaldy.
"Biz qaıyrymdylyq aksııasyn Dımashtyń týǵan kúni qarsańynda ótkizgimiz keldi, óıtkeni, Dımash mahabbattyń, dostyqtyń, kóńil bildirýdiń jáne yntymaqtastyqtyń belgisi ispetti. Dımash úshin bul baǵaly syılyq bolatynyna senimdimiz", deıdi brazılııalyq fan-klýbtyń ákimshisi Tatıana Rıbeıro.
"DKFCB" fan-klýby 2018 jyly quryldy. Áleýmettik jelilerdegi resmı akkaýnttardan ózge brazılııalyq Dears-terde ánshiniń óner jolymen qatar, Qazaqstannyń mádenıeti men tarıhyna arnalǵan jeke blogy bar. Blogty Brazılııadaǵy Qazaqstan elshiliginen aqparat alyp otyratyn Sabrına Masıel júrgizedi.
"Blogtaǵy ár jazbada Dımashtyń eli týraly jarııalaımyz. Sondyqtan, bul posttarda halyqtyq jáne dástúrli mýzykany qoldanamyz. Pop-mýzyka bizdiń fan-klýbtyń ózge áleýmettik jelilerinde paıdalanylady", deıdi Sabrına Masıel.
15 qarashada Dımashtyń brazılııalyq fan-klýby eki jyldyǵyn atap ótedi. Kezdesý 24 mamyrda joparlanǵan basqosý sekildi Brazılıa qalasynda ótý kerek. Byltyr DKFCB San-Paýlý, Rıo jáne Resıfı qalalarynda úsh kezdesý ótkizdi.
