Reıd barysynda "Sálem", "Etalon", "Uljan", "Qamqor" bazary men "Astyqjan" saýda úıleri tekserildi. Mobıldi top saýdagerler men turǵyndarǵa qoǵamdyq oryndarda koronavırýs ınfeksııasyn juqtyrmaý úshin qaýipsizdik sharalaryn qatań saqtaýǵa keńes berdi.
"Biz búgin mobıldi toppen birge "Etalon" bazaryna tekseris júrgizdik. Karantın rejımi boıynsha qyzmetkerlerge túsindirý júrgizildi. Tekseris barysynda keı satýshylardyń maskany durys taqpaǵany anyqtaldy. Keı jerlerde sanıtaızerler joq. Bul máseleler boıynsha bazar basshylyǵy men ákimshilikke túsindirý júrgizdik. Ákimshilik bul rette óz qyzmetkerlerine eskertý jasaıdy", – dedi Saryarqa aýdany taýarlar men qyzmetterdiń sapasy men qaýipsizdigin baqylaý basqarmasynyń sanıtarlyq-gıgıenalyq qadaǵalaý bólimi basshysy mindetin atqarýshy Damıra Nuran.
16 maýsym kúni bazarlar men saýda úılerinde jasalǵan tekseris boıynsha Saryarqa aýdany ákimdigi ókilderi men polısııa tarapynan mynadaı eskertýler jasaldy: "Etalon" saýda úıi boıynsha shaǵym bolmasa da, qyzý ólshegish sanyn kóbeıtý usynyldy, "Sálem" bazarynda dezınfeksııalyq kilemsheler men qyzý ólshegish, "Astyqjan" saýda úıinde dezınfeksııalyq kilemshe men antıseptık bolmaýyna baılanysty eskertý jasaldy. Al, "Uljan", "Kóktal Avto" bazarlary barlyq erejege saı jumys isteýde.
"Ákimshilik tarapynan "Etalon" saýda úıi boıynsha monıtorıng jasaldy. Monıtorıng qorytyndysy boıynsha, aıtarlyqtaı norma buzýshylyq bolǵan joq. Kireberiste termometr qoıylǵan, maskalyq rejım saqtalǵan. Eki saýda oryny barlyq normaǵa saı jumys istep jatyr. Bas sanıtar dárigerdiń qaýlysyna sáıkes, kashyqtyq saqtalýda. Sanıtarlyq jáne dymqyl óńdeý de ýaqytyly jasalyp turady", – deıdi "Etalon" saýda úıiniń ákimshilik-sharýashylyq bólimi qyzmetkeri Ǵalymjan Sholanov.
Aıta ketsek, mobıldi top mamyr aıynan beri birqatar reıd júrgizip, sanıtarlyq normalardy buzǵan nysandardyń jumysyn toqtatý týraly sheshim qabyldady. Mobıldi top ókilderiniń usynysy boıynsha, kásipkerler sanıtarlyq normalardy qatań saqtaýy tıis, sebebi ınfeksııa juqtyrý qaýpi áli de joǵary.
