Osy maqsatta óńirge arnaıy kelgen Qazaqstan Kásipodaqtar federasııasynyń tóraǵasy Satybaldy Dáýletalın, О́zbekstan Respýblıkasy Jızaq oblysy kásipodaqtar keńesiniń tóraǵasy Nýsýratýlla Pardaev, Túrkistan oblysy ákiminiń orynbasary Sáken Qalqamanov jáne federasııanyń úıym basshylary "О́rgebas" jáne Ferdoýsı aýyldaryna baryp, sý apaty zardaptaryn joıý barysyndaǵy atqarylǵan jumystardyń barysymen, "Dostyq", "Jeńis", "Jańa-turmys" eldi mekenderinde salynyp jatqan turǵyn úılerdiń qurylysymen tanysty. Myrzakent kentinde jergilikti turǵyndarmen jáne sý apatynan zardap shekken eldi mekenderdegi jalpy orta mektepteriniń basshylarymen kezdesti.
Turǵyndarmen kezdesýde Satybaldy Dáýletalın Maqtaaral aýdanynyń turǵyndary berekeni kókten emes, qajyrly eńbekten tilegen tynymsyz eńbekqor jandar ekenin atap ótti. "Muqtaj janmen óz jylýymen bólisý dástúri qazaq halqynyń qanynda bar. Sondyqtan da, biz osyndamyz. Kásipodaqtar elmen birge, taǵdyr tońdyrǵan maqtaaraldyqtarǵa jylýmen keldik. Osyndaı qajetti is-sharalardy jedel túrde qarastyryp, júzege asyrǵan Prezıdent pen Úkimetke óz rızashylyǵymdy bildirgim keledi. О́z kezeginde, áriptesimiz – О́zbekstan Kásipodaqtar federasııasymen ortaq kelisim boıynsha Maqtaaral aýdany eldi mekenderi turǵyndaryn qoldaý maqsatynda birlesip, 66 mıllıon teńgeniń kómegin kórsetý týraly sheshim qabyldadyq. Biz tórt orta bilim beretin mektepterge ınteraktıvti kompıýterlik synyptardyń tolyq jabdyǵyn tapsyramyz" , dedi S.Dáýletalın.
Sondaı-aq ol Amanjolov, Músirepov, Ferdoýsı atyndaǵy orta bilim beretin jáne "Nurly jol" eldi mekenindegi mektepterdiń dırektorlaryna 25 noýtbýk, 25 parta men 50 oryndyq, 2 prınter, bir-birden mýltımedıalyq taqta tabys etti. Sonymen qatar, sý tasqynynan zardap shekken eldi mekenderdiń 100 turǵynyna federasııaǵa qarasty "Kóktem", "Merki", "Mankent", "Jańaqorǵan", "Shýchınsk" shıpajaılaryna joldama berildi. Tegin joldamalar zeınetkerlerge, muǵalimderge, sondaı-aq, kópbalaly jáne az qamtylǵan otbasylarǵa da tabys etiledi.
Apattan zardap shekken aýdannyń muǵalimderine Respýblıkalyq bilim jáne ǵylym qyzmetkerleri salalyq kásipodaǵy tarapynan da eleýli qoldaý kórsetilip, 365 bilim salasy kásipodaq múshesine materıaldyq kómek retinde 35 myń teńgeden berildi. Jalpy Kásipodaqtar federasııasynyń múshelik úıymdary 50 mln teńgeniń kómegin kórsetti. О́z kezeginde О́zbekstannan "Dostyq kerýenin" bastap kelgen, Jızaq oblystyq kásipodaqtar keńesiniń tóraǵasy, О́zbekstan Senat depýtaty Nýsýratýlla Pardaev baýyrlastyq ári kórshilik qarym-qatynastar qazaq jáne ózbek halqynyń qatynastarynyń negizi bolatynyn atap ótti. "Búgin tańerteń Qazaqstan-О́zbekstan shekarasynan bizdiń "Dostyq kerýeni" ótti. Biz de Qazaqstan Kásipodaqtar federasııasy sııaqty baýyrlas halyqtyń basyna túsken osy qıyndyqta beıtarap qala almadyq jáne bizdiń qazaqstandyq áriptesterdiń zardap shekkenderge qaıyrymdylyq kómek kórsetý aksııasyna qosyldyq", dedi ózbekstandyq delegasııanyń basshysy. О́zbekstan kásipodaqtary jalpy somasy 16 mıllıon teńge kóleminde gýmanıtarlyq kómek alyp kelgen. Onyń ishinde alǵashqy qajettilik taýarlary, qurylys materıaldary, tósek-oryn jabdyqtary men azyq-túlikter bar. Maqtaaral aýdanynyń turǵyndary eki el kásipodaqtaryna osy bastamalary men aýdannyń ómirin qalpyna keltirýge sińirgen eleýli úlesteri úshin óz alǵystaryn bildirdi.
