Joǵarǵy sot tóraǵasynyń aıtýynsha, 2,5 jyl ishinde birqatar pılottyq jobalar júzege asyrylyp, 22 zań jobasy ázirlengen. Onyń ishinde 10 zań jobasy qabyldandy.
Sýdıalyq kadrlar salasynda da ózgerister boldy. Atap aıtqanda jańa sýdıalardy irikteý maqsatynda tıimdi HR-tehnologııalar engizilgen, sýdıalardyń tártiptik jaýapkershiligi, kadrlyq rezerv máseleleri Joǵarǵy sottan Joǵary sot keńesiniń qaraýyna berilgen, sondaı-aq jumys istep júrgen sýdıalardy baǵalaýdyń jańa ınstıtýty – Sot tóreliginiń sapasy jónindegi komıssııanyń qyzmetine de ózgeris jasalǵan. Sonymen qatar Jaqyp Asanov jańa baǵalaý ádistemesi boıynsha 2022 jylǵa deıin sýdıalardyń shamamen 80% attestasııadan ótetinin jetkizdi. Onyń aıtýynsha, 2019 jyly attestasııaǵa qatysqan sýdıalardyń 10% baǵalaýdyń jańa júıesinen óte almaǵan.
Budan bólek Memleket basshysyna aqtaý úkimderi sanynyń kúrt óskeni, ásirese, bul kórsetkish aýyr qylmystar boıynsha 12 ese, al asa aýyr qylmystar boıynsha 6 ese artqany aıtyldy.
Joǵarǵy sot tóraǵasy Qazaqstan Prezıdentine Azamattyq prosessýaldyq kodekske engizilgen túzetýler bıylǵy 22 maýsymnan bastap kúshine enetinin jáne ondaǵy ózgerister týraly baıandady.
Sonymen qatar ákimshilik ádilet máselesi týraly da sóz qozǵaldy. Atalǵan ınstıtýt Qazaqstanda Ákimshilik rásimdik-prosessýaldyq kodeksti qabyldaǵan soń engiziledi. Qazirgi ýaqytta ol Senattyń qaraýynda.
Joǵarǵy sot tóraǵasy Memleket basshysyna COVID-19 pandemııasy kezeńindegi sottardyń jumysy týraly da aqparat berdi. Sondaı-aq ol proseske qatysýshylardyń qaýipsizdigin qamtamasyz etý úshin barlyq qajetti sharalardyń qabyldanatynyn atap ótip, tótenshe jaǵdaı kezeńinde jáne odan keıin de sot tóreligin júzege asyrý isi toqtamaǵanyn aıtty.
Áńgimelesý qorytyndysy boıynsha Memleket basshysy sot júıesiniń aldyna birqatar naqty mindetter qoıdy jáne qazirgi kúrdeli kezeńde sottardyń jumysy úzdiksiz jalǵasa beretindigine senim bildirdi.
