astana.gov.kz
Azamat Bısenbaıuly qyzmet etetin Báıterek aýdany – Batys Qazaqstan oblysynyń Reseımen irgeles jatqan óńiri. Al keshegi karantın aıaqtalǵanǵa deıin oblysta koronavırýs dıagnozymen tirkelgen naýqastardyń 90 paıyzy dál osy Reseıden keletin. 29 naýryzda ashylǵan karantındik-provızorlyq stasıonar jumysy áli kúnge deıin qaınap jatyr.
Dárigerlerge arnalǵan jeke qorǵanysh quraldary, jabdyǵy túgel bolǵan kúnniń ózinde kezdesetin qıyndyqtar bar. Máselen, dezınfeksııalyq suıyqtardy únemi paıdalanǵandyqtan, kóp dárigerdiń denesinde allergııalyq asqyný, teri bórtpeleri paıda bolǵan. Onyń ústine naýqastarmen únemi qarym-qatynasta júrgendikten, vırýs juqtyrý qaýpi óte joǵary. Munyń psıhologııalyq salmaǵyn da qosyp qoıyńyz.
Ras, koronavırýsqa qarsy kúreste júrgen dárigerlerge memleket ótemaqysy berilip jatyr. Biraq ol tolyq kólemde tólenýi úshin jumys saǵaty 176 saǵattan kem bolmaýy kerek eken. Odan az bolsa, sáıkesinshe azaıa beredi. Azamat Bısenbaıulynyń oıynsha, bul jerde ádildik prınsıpi saqtalǵan. Árkim beınetine saı zeınetin kóredi.
Azamat provızorlyq gospıtalda eki aı qyzmet etken soń óz erkimen suranyp, qalypty qyzmetine aýysty. Qaýipsizdik talaptaryna saı bir apta karantınde bolyp, otbasymen de qaýyshty-aý.
– Shynymdy aıtsam, provızorlyq stasıonardaǵy jumys ońaı emes. Onyń ústine ómir bolǵan soń aýrýhananyń, qyzmet mansabyńnyń syrtyndaǵy máseleler de az emes. Otbasyńdy, balalaryńdy saǵynasyń. Jeke shańyraǵyńnyń jumysy, úıdiń jóndeýi sekildi turmystyq sharýalar da er adamdy kútip turady ǵoı. Sondyqtan mamyrdyń sońynda burynǵy qyzmetime surandym, – deıdi A.Izbasov.
Biraq bul keńshilik kópke sozylmady. Elde karantın merzimi aıaqtalǵan soń turǵyndarǵa keńshilik berilisimen, indet juqtyrǵandar sany eselep artyp ketti. Provızorlyq gospıtaldan Azamat Bısenbaıulyn izdeýshiler kóbeıdi.
– Áriptesterim áýeli «qaıtadan kelseńshi, bizde qıyn bolyp jatyr» dep habarlasty. Naýqastar arasynda pnevmonııa, aýyr asqynýlar kóbeıip ketken. Ádette mundaı «tymaý tolqyny» kóktem men kúzde bolady ǵoı. Bıylǵy jaǵdaı bólek. О́kpe qabynýyna qosalqy dertter qosylǵanda, ómir men ólimniń naǵyz shaıqasy bastalady. Jaǵdaıdy túsindim. Sonda da bolsa ózim eki aı ortasynda júrgen «qan maıdanǵa» qaıta túsýden qashqaqtap edim. Bas dárigerdiń buıryǵy bultartpady. Mine, úshinshi kún – qaıtadan Báıterek aýdanyndaǵy provızorlyq gospıtalda qyzmette júrmin, – deıdi Azamat.
Eseptep qarasaq, Azamat óz úıinde on shaqty kún ǵana bolypty. Degenmen adamzattyń amandyǵy otbasyńnyń da tynyshtyǵy ǵoı. Elden alabóten baqytty bola almaısyń. Tańdap alǵan kásibiń, bergen antyń – naýqastyń aýrý janyna shıpa tabý, dertin jeńýine kómektesý bolsa, sheginetin jer joq. Azamat Izbasov muny anyq túsinedi.
Batys Qazaqstan oblysy
