Aqjaıyq aýdanynda balalar men jasóspirimder týrızmi jaqsy damyǵan. Aýdan oqýshylary buǵan deıin de qıyndyǵy túrli dárejedegi joryqtarǵa qatysyp, synnan ótken. Kóz súrinetin tóbesi joq mıdaı jazyq dalanyń ulandary 2015-2017 jyldary Jońǵar Alataýyna taý joryǵyn jasap, jerlesterin tań qaldyryp edi. Bıyl áıgili aqyn jerlesi Juban Moldaǵalıevtiń ǵasyrlyq mereıtoıyna oraı taǵy bir erekshe sapardyń tusaýy kesildi.

"Bul joryǵymyzdy Jubannyń kindik qany tamǵan Myńshuqyr qonysynan bastadyq. Aqynnyń beınesi salynǵan kilemshe bizben birge Oral, Nur-Sultan, odan ári Altaı taýynyń qasıetti bıigi – 4506 metrlik Muztaý shyńyna shyǵady. Júrgen jerimizde jergilikti týrızm ortalyqtarymen birge aqyndy eske alyp, sharalar ótkizemiz. Joryqty Almaty qalasynda – aqynnyń zıraty basynda qorytyndylaımyz", - deıdi Aqjaıyq aýdanyndabalalar men jasóspirimder týrızmi ortalyǵynyń bólim meńgerýshisi, Qazaqstan Respýblıkasynyń eńbek sińirgen týrızm nusqaýshysy, Máskeý balalar týrızmi akademııasynyń qurmetti professory Qýanysh Aqqalıev.

Aýdandyq balalar týrızmi ortalyǵynyń músheleri, Taıpaq orta mektebiniń oqýshylary Myńshuqyrdaǵy sharadan keıin aýyldyq okrýg ortalyǵy Qaraýyltóbe aýylyna deıin 60 shaqyrymdyq dalany velosıpedpen júrip ótti. Sóıtip, aqyn sýreti beınelengen kilemsheni "Alpilik 3A" sanatyna jatatyn taý joryǵyna attanǵaly otyrǵan Qýanysh Izimǵalıulyna tabys etti. Sharaǵa qatysqan jergilikti aqyn Saǵyntaı Bısenǵalıev alys saparǵa attanǵaly turǵan taýshyǵa aqjol tilep, óleń shýmaqtaryn arnady. Qýanysh Aqqalıev Oral qalasynan maýsymnyń 24-i kúni attanbaq.

Batys Qazaqstan