Aımaqtar • 22 Maýsym, 2020

Túrkistanda halyqaralyq týrızm ýnıversıteti ashyldy

140 ret kórsetildi

Túrkistan qalasynda Mádenıet jáne sport mınıstrligi janynan Halyqaralyq týrızm jáne meımandostyq ýnıversıteti quryldy. Bul oqý ordasy Elbasynyń bastamasy negizinde Memleket basshysynyń tapsyrmasymen ashylyp otyr, - dep habarlaıdy Egemen.kz.

Qazaqstandaǵy halyqaralyq deńgeıdegi tuńǵysh ýnıversıtet týrızm salasyndaǵy álemdik deńgeıdegi mamandar daıarlaıtyn bolady. Týrıstik bıznestiń naqty qajettiligi eskerilgen ýnıversıtettiń 4 jyldyq bilim berý baǵdarlamasynyń nátıjesinde túlekter halyqaralyq úlgidegi eki dıplom alady. Bul olardyń álemniń kez-kelgen jerinde óz mamandyǵy boıynsha esh kedergisiz jumys isteýine múmkindik beredi. Ýnıversıtette otandyq jáne sheteldik professorlar, ǵylym doktorlary men týrızm jáne servıs salasyndaǵy aldyńǵy qatarly iri kompanııalardyń TOP-menedjerleri dáris oqıdy. Sondaı-aq, túlekter tájirıbesin BUU Halyqaralyq týrıstik uıymynda (UNWTO) jetildiretin bolady.

Ýnıversıtet bazasynda biliktilikti arttyrý ortalyǵymen birge IELTS, TOEFL sııaqty halyqaralyq emtıhandardy tapsyrý, shet tilderin tereńdetip oqytý úshin til ortalyǵy jumys isteıdi. Týrızm fakýltetterinen basqa sporttyq kafedralar da bar. Jańa Halyqaralyq týrızm ýnıversıteti bıyldan bastap talapkerlerdi qabyldaıdy, ıaǵnı 2020-2021 jylǵy oqý jylyna 800 grant bólingen. Týrızm mamandyǵyna beıindik páni: geografııa jáne shet tili, al UBT shekti baly - 50. Deneshynyqtyrý jáne sport mamandyǵyna shyǵarmashylyq emtıhan, UBT shekti baly - 70. Ýnıversıtetke qujat qabyldaý aǵymdaǵy jyldyń 20 maýsymy men 7 shilde aralyǵynda júrgiziledi. Shyǵarmashylyq emtıhan 8 jáne 13 shilde aralyǵynda ótkiziledi.

1

 

Túrkistan oblysy

Sońǵy jańalyqtar

Uqsas jańalyqtar