Alaıda halyqtyń Beısendi shyndyǵynda jaqsy kórgenin mezgilsiz qazasy kórsetti. Ol ketkende qaımana qazaqtyń da jylaǵanyn kórdik. Áleýmettik jelilerde joqtamaǵan adam joq. Birneshe kúnge deıin búkil qazaq jýrnalıstıkasy, áriptesteri, kózkórgender tolassyz tulǵaly azamatty azalady. BAQ-taǵy aqparattyń barlyǵy derlik Beısen Quranbekti joqtady.
О́ıtkeni ol ár adamdy ózindeı kórdi. Jýrnalıst qoı dep júginip, aldyna kelgenniń barlyǵynyń ornyna ózin qoıdy. Árbir adamdy túsinýge, shamasy kelse árkimge kómektesýge umtyldy.
Ol ózimen qysqa ýaqytqa bolsa da kezdesken, tildesken jandardyń ishi-baýyryna kirip, etene jaqynyndaı syr tartyp, baıyrǵy dostardaı bir jaqsylyq jasaýǵa umtylyp turýshy edi. Ishten shyqqan osynaý shynaıy qurmetimen-aq adamnyń janyna shapaǵat seýip turatyn minezin kim umytsyn?!
Sondyqtan da Beısenmen taǵdyr toǵystyrǵan adamdarǵa ony joǵaltý qandaı qıyn bolǵanyn paryqtaı berińiz. Alaıda BAQ, áleýmettik jelilerde bolsyn, Beısendi qımaǵan estelikter tolassyz aǵylyp, sol jazýdyń maıtalmany, sózge sheshen, qalamy kósem eń jaqyn áriptesteri ádiletsiz kelgen ajalǵa sene almaı eseńgirep qaldy.
Sondyqtan da bul estelikti jazý ári ońaı, ári óte qıyn bolatynyn bilgenbiz. Ońaı bolatyny, ol týraly, onyń jaqsy qasıetteri týraly aıtatyn adamdar jetkilikti. Jasyndaı ǵumyrynda Beısen óz ómiriniń ónegeli betterin saýapty, ǵıbratty joldarmen jazýǵa umtyldy. Sózdiń narqyn, adamnyń parqyn biletin suńǵyla aqyldyń ıesi edi.
Bul estelikti jazý qıyn da boldy. О́ıtkeni biz bilmeıtin Beısendi biletin et jaqyndary men eń jaqyn dostarynyń kóz jastary kepken de joq. Aıaýly jary da qazir suhbat beretin halde emes...
Biz Beısenmen jýrnalıstıkaǵa úzeńgi qaǵystyra qatar kelgen ekenbiz. Bul táýelsiz eldiń azat oıly jýrnalıstıkasy qalyptasa bastaǵan jyldar bolatyn. Biz «Egemen Qazaqstan» gazetiniń Prezıdent pýlyndaǵy tilshisimiz. Ol «Habar» agenttiginiń pýldaǵy jýrnalısi. Bul bizdiń alaýlap janyp turǵan, táýlikpen eseptespeı eńbektengen kezderimiz eken. Osynaý jyldar bizge egemendiktiń eleń-alańyndaǵy barlyq aıtýly oqıǵalardyń, tarıhı sátterdiń tuńǵysh kýágeri, jarshysy bolýdy buıyrtty.
Áli esimde, birde pýldaǵy jýrnalıster Elbasynyń Almatydaǵy rezıdensııasynda AQSh-tyń burynǵy Prezıdenti Bıll Klıntonnyń brıfıngin tún ortasyna deıin kúttik. Osyndaı kezderde ádettegideı, sózimiz jarasatyn 3-4 jýrnalıst ońashalanyp, alańsyz áńgime-dúken quramyz. Armandaımyz. Pikir almassaq kózqarastarymyz toǵysatyn, qaljyńdassaq ázilimiz jarasatyn, syrlassań shynyńdy aıtatyn sol eki-úsh adamnyń biri – Beısen edi. Ýaqyty jetkende, bári de jazyla jatar.
Árkimniń óz Beıseni bar
Ol qandaı edi? О́z tustastarynan nesimen erekshelendi? Neni kózdedi, ne nársege qushtar boldy? Endeshe, bozbala Beısen jaıynda jan joldastarynyń biri, tanymal jýrnalıst Amangeldi Seıithan baıandasyn.
«Bozbala Beısen dedik pe... Bozdap qalamyz dep kim oılaǵan? Aqyrǵy ret sóıleskenim eske túse beredi. Sońǵy kórgenimde ózi de máńgige bet alǵanyn eptep sezdirdi. Aıtpaqshy, Gúlmıra kelinnen qońyraý túsken eken. Estimeppiz. Habarlama qaldyrdy. «Inińiz izdep jatyr. Saǵyndym deıdi». Saǵynǵan iniden aınalasyń ǵoı. Dereý jınaldyq ta, izdep bardyq. Kórgende kóńil kónshidi. Kóz janary jaqsy eken. Kúlip qarsy aldy. Muńnyń izi de joq. Emdelý kezinde dem berý durys. Sóz arasynda áli-aq ońalyp ketetinin aıtyp, sendirýge tyrystyq. Aqyldy ǵoı, basyn ızep kúldi. Kúldi de, kúrsindi. Kúrsingenin jasyrdy bizden. Artynsha arqalanyp, sóılep ketti.
Sol joly uzaq sóılestik. Dáriger eki keldi. Kóp mazalamaýymyzdy qalaǵany bolar. Oǵan da mán bergen joqpyz. Baıaǵy shaqtan búgingi kezge sholý jasap, ómirdi áńgime ettik. Kóńildi otyrdy. Bolashaqty da birge kezdik. Dál sol sátte ońalyp ketetinine ońaı sendik. О́ıtkeni ózgelerdiń omalyp qalmaýyna ózi sebep bolyp edi ǵoı. Sózimen jigerlendirip, qıynnan jol taýyp berip, talaılardyń aýrýdan aıyǵyp ketýine kúsh salǵan.
Balalyq shaǵyn bilmeımiz. Bilemiz, ózi aıtqan dárejede. Ákeni aǵa dep tanydy... Ájeni sheshe dep bildi... Sol sońǵy barǵanda syryn aıtty. «Apamdy kishi aǵama tapsyrdym, qaıta oralsam, qolyma alamyn ǵoı». Tapsyrdym degende, denem selk ete qaldy. Sezim degen de tym júırik keıde. Bala kezinen talaı syr shertken. Bozbala kezin jatqa soǵamyz. О́ıtkeni qatar óstik.
Alǵash kórgenim esimde. «Sport» gazetinde edik. Bas redaktor ári ustaz telefon soqty. Bólimge, bólmege. Shaqyrdy, kabınetine. Bardyq. Barsaq, aldynda bir bala otyr. Mán berdik, bermedik. Ustaz ári bas redaktor qolyma dápter ustatty. «Mynaý jigit «taý qoparamyn» deıdi. Bárin bilip tur. Kórshi, má, jazǵandaryn». Nes-aǵam (Nesip Júnisbaev) ázildep sóılegendi durys kóredi. Keıde shyn sóziniń ózin qaljyńǵa balap alatyn kezimiz kóp. Balany ertip, bólmege keldik. Atyn aıtty, aıtpady, anyq este joq. Dápterin qaldyrdy. Taǵy birde soǵatynyn bildik. Dápteri qolymyzda. Oqydyq, jazýy marjandaı eken. Uqyppen jazylǵan.
Bozbala Beısen úzdiksiz izdenetin. Kez kelgen mádenıetti zertteıtin. Qaı sala bolsa da. Tereńdeı berdi. Tabıǵat bergen qara kúshi taǵy bar. Shyǵys jekpe-jekteriniń birneshe túrin jaqsy meńgerdi. Karateni kórdi. Kıokýshınkaıǵa bardy. Ony keıin Sársen inisine qaldyrdy. Sársen chempıon atandy. Beısenjan endi aıkıdomen shuǵyldandy. Tek qara kúshin shyńdaǵan joq. Erik-jigerin. Aqyl-oıyn! Aıtyp otyrady. «Aǵa, mynaý aıkıdo ne degen óner? Qara kúshti tipti de qajet etpeıdi. Aqylǵa qurylǵan. Ne degen mádenıet! Rýhty shynyqtyrýǵa arnalǵandaı». Tıbet medısınasyn zerttegen kezi boldy. Bizdiń úıdiń bir balasy sekildi dedik qoı. Ápkem Nurgúlmen kóp áńgimelesetin. Mýzyka, fılosofııa, tarıh, ádebıetti jaqsy biledi. Ápkem aıtady: «Beısen jaqsy kele jatyr. О́resi qatty ósti. О́zin qaıda daıyndap júr? Aqyldy shyńdap keledi. Dene kúshin de shynyqtyrdy. Deneni ǵana emes, nápsini de shynyqtyryp keledi. Birneshe kún uıyqtamaýy múmkin. Birneshe kún ash otyra berýi de. Ol qaıda daıyndalyp júr?» Ol suraqty tike qoımasaq ta, Beısenjanǵa aıtam. «Inim! Bir baǵytqa dendep enip ketpe. Toqtaıtyn tusyńdy bil. Der kezinde tejelý de óreniń deńgeıine ólshem. Qazaqy qalyptan ajyramaý kerek. Anaý ulys bylaı aýqattanady, myna ulttyń qoregi osyndaı eken dep, súttiń qadiri men ettiń qýatyn umytpa». Inim kúlip qoıady. «Aǵa, bári baqylaýda. Kúmánińiz bolmasyn».
Starosta Beısen stýdent kezinde-aq kýrsqa qamqor edi
– Beısekeńdi alǵash ret 1993 jyly KazGÝ-ge qujat tapsyryp júrgende kórdim. Ústinen aq kostıým-shalbaryn tastamaıtyn onyń júris-turysy, óz-ózin ustaýy asa senimdi kóringendikten bolar, ony jas muǵalimderdiń biri eken dep qalǵanymyz ras. Al sabaq bastalǵanda aramyzdaǵy jasynyń úlkendigi bar, ári sol kezdiń ózinde «Sport» gazetinde tilshi bolyp jumys isteıtini belgili bolǵannan keıin Beısendi barlyǵymyz biraýyzdan starosta etip saılap aldyq. Mektepti endi ǵana bitirgen biz úshin áskerde bolyp qaıtqan kýrstastan basqa kandıdatýra qarastyrylǵan da joq. Sodan ol kýrstaǵylardy bilý, taný, qorǵaý mindetine birden kiristi. Grýppalastardyń árqaısysymen sóılese kele, kimniń nege áýestenetinin bilip alǵannan keıin ár grýppalasqa jeke-dara qurmet kórsetip, sáti kelgen jerde qolpashtaı sóıleıtin ádeti bar bolatyn. Keıin oılap qarasam, Beısekeń ár qazaqqa qanat bitirip, kótermelep sóıleýdi sol kezdiń ózinde-aq ómirlik mıssııasy etip alǵan eken, deıdi Dáýren Qudaıbergen.
...Iá, men de el qatarly qaraly habar taraǵan sátten-aq qolyma qalam alyp, onyń azamattyǵy, iskerligi men janashyrlyǵy jaıynda estelikterdi birinen soń birin jazyp otyrýyma bolar edi. Biraq men olaı jasaı almadym, dátim barmady. Oǵan úsh sebep bar. Birinshi. Dosymnyń ómirden ótkenine sene almadym, naqtysyn aıtqanda sengim kelmedi. Olaı deıtinim Beısekeńdi bilgeli onyń birde-bir ret eńsesi túsip, tyǵyryqqa tirelgenin, ál-dármeni quryp, boldyryp, sharshaǵanyn kórgen emespin. Sebebi onyń qashanda mereıi ústem, júzi jarqyn júretin. Jáne ol bastaǵan árbir isin sońyna deıin jetkizip qana qoımaı, tyńǵylyqty isteıtin. Al onyń nátıjesi bárimizge belgili «Aıtýǵa ońaı», «Qareket» sekildi baǵdarlamalar arqyly zamandastarymyzdyń rýhanı álemine olja bolyp oralyp jatty. Jáne ol jeńil-jelpi aýrýlardan óz ózin ıoga tásilimen emdep alyp otyratyn. Amal neshik, ýaqyt uzaǵan saıyn asyl azamattyń bul ómirmen qosh aıtysqanyna kózim tolyqtaı jetkende baryp, esimdi jıǵandaı boldym. Ekinshi. Sońǵy 27 jylda onyń jasaǵan jaqsylyqtaryn saralap shyǵýyma maǵan birshama ýaqyt qajet boldy. Sebebi dosymnyń aldyndaǵy qaryz men úshin tym kóp edi. «Sol qaryzymdy endi qalaı óteımin, qalaı jeńildeımin» degen oıdyń shyrmaýynan shyǵa almadym. Úshinshi. О́tken jyly «Jetisý» telearnasynyń 20 jyldyǵynda sońǵy ret kórgendegi beınesi jatsam da, tursam da kóz aldymnan ketpeı qoıdy. Jáne sol beıne maǵan áldeneni aıtqysy keletindeı áserde júrdim. Kúttim. Túsime kirer, aıan berer dedim. Biraq eshteńe demedi...
Sońǵy alty jyl Beısenge aýyr boldy
– Sońǵy alty jyl Beısekeńe óte aýyr boldy, – deıdi «Jetisý» telearnasy dırektorynyń birinshi orynbasary, dosy Dosan Qyzaıbekuly. – Taldyqorǵanda «Jetisý» arnasynyń jumystary, Almatyda «Aıtýǵa ońaı», keıin «Qareket» habarynyń túsirilimderi, arasynda basqa da jobalar men sharýalardy rettep kóp shapqylady. О́zgesin aıtpaǵanda, bir ǵana «Aıtýǵa ońaı» tok-shoýy qatty qajytty. Jylyna efırge 235 habar shyǵady, súzgiden ótpeı, arhıvke ketkeni qanshama. Osy habardy tolyq segiz jyl júrgizdi. Endi esepteı berińiz... Habarǵa jylap kelgen qansha myńdaǵan keıipkerdiń kóz jasyn súrtip, birge egildi, súıinshilep kelgen qansha myńdaǵan jurtpen birge qýandy. Adamnyń júregi – tas, jany temir emes qoı. Kúnderdiń kúninde ol da sharshaıdy. «Bir adamǵa bolsa da paıdamyz tısin» dep, el úshin, qazaq úshin tynym tappaı júrgen baýyrymyzǵa qurǵyr keseldiń jabysqanyn baıqamaı da qalyppyz.
«Bóri aryǵyn bildirmes...» Toǵyz aı jany qınalyp, adam tózgisiz azapqa tússe de, syr bildirmeı ketti ǵoı. Kerisinshe, kóńilin suraı barǵan jurtqa basý aıtyp, jubatyp jatatyn. Qaıran, Beıseke! «Seke, Doseke, bul dertti áli-aq jeńemiz! Úsheýimiz zeınetke shyqqanda kórshi bolamyz, shyǵarmashylyqpen aınalysamyz. Nemere baǵamyz» degen armany bar edi. Sol armanyna qatty asyqty. Aýyryp júrse de, bolashaq úıimizdi salatyn jerdi de jyldamdatyp aldyrǵan edi. Átteń! Endi, mine, ishimiz kúıip, janymyz jetimsirep qaldy. Eńirep jylasaq ta, ıen dalaǵa ketip aıǵaılasaq ta, ishtegi sherden jýyq arada aryla qoımaspyz.
«Jyly júrektiń ıesi edi»
Bul týraly Eýropa Bırankaı Halyqaralyq Aıkıdo federasııasynyń negizin qalaýshy, Krıs Mýnı bylaı deıdi: «Beısendi joqtap sóılesý tym aýyr. Biz alǵash ret 2001 jyly kezdestik. Sodan beri ótken jıyrma jylda men ony tanyǵan ústine tanı tústim. Men ony saıası jýrnalıst retinde emes, qarapaıym Beısen retinde tanydym. Aıkıdo ónerine qumartqan shákirt retinde bildim. Ýaqyt óte kele onyń boıynda erekshe erik-jiger, asqaq rýh baryn sezdim. Ol maǵan – shákirt, men oǵan ustaz edim. Biraq keıin aramyz budan da jaqyndaı tústi, ol meniń serigime, dosyma aınaldy. Ol jomart edi, júregi, jan dúnıesi keń edi. Meniń Qazaqstanǵa endigi saparym múldem basqasha bolady, óıtkeni Beısen joq. Biz endi jolyqpaımyz. Biraq men ony umytpaımyn, onyń beınesi máńgi jadymda saqtalady. Ol Aıkıdo qaýymdastyǵyn Qazaqstanda quryp, ony damytý úshin orasan eńbek sińirip, kóp kómek qyldy. Men ómirimde osyndaı adammen kezdeskenime, onymen dos bolǵanyma rızamyn».
Kún saıyn kóz aldymyzda bıikteı berdi
Beısendi áleýmettiń jýrnalısi retinde tanytqan «Aıtýǵa ońaı» tok-shoýynyń prodıýseri, qarymdy jýrnalıst qaryndasy Álııa Qudaıbergenniń de estelikterin keıinge qaldyrsaq ta, myna joldardan attap ótpeý paryz.
«Sizdeı adam joq eken, osyǵan kún ótken saıyn kózim jete túsýde.
Birde, aǵanyń atyn atap, qolaısyzdaý bir jazbalar jazyp, syrtynan biraz sóz aıtqan adamdy jerden ap, jerge sap, shyr-pyrymyz shyǵyp otyrǵanbyz. Aǵa kirip keldi. «Týysqandar, qalaısyńdar!» dep. Arqasyndaǵy zildeı (ishi toly kitap) rıýkzagyn terezeniń aldyna qoıa saldy da, buryshtaǵy dıvanǵa baryp jaıǵasty. Aıtqymyz kelip otyr, álgi jazba jaıly. Aıta almaımyz. Bir kezde áıteýir, ebin taýyp aıttym-aý. Jáne «Dál qazir ózine habarlasyp aıtyńyz, ekijúzdiligin» deımin ǵoı, zildenip.
Aǵa túk tańǵalmastan, týra sýrettegideı jymıyp qana: «О́óı, Álek-e-e, kórdim ony. Erýnda. Jaqsy jigit ol, áli-aq túsinedi qatesin. Oǵan bola kóńilderiń túspesin» deı saldy. Boldy, taqyryp jabyldy.
Taǵy birde jap-jas bop aǵaǵa neshetúrlini aıtyp, syrtynan biraz nárse uıymdastyrmaq bop, kóńilin aýyrtqan adamǵa arada birer jyl ótkende aqsha berip júrgenin baıqadym. «Aǵa, bul ne sonda? Ne degen uıaty joq adam anaý?» degenime: «Áleke, qınalyp júr eken. Jaǵdaıyn aıtyp, kómek surady. Jaraıdy, Áleke, baqytty bolsyn» degen edi.
«Aǵanyń aldynda bir adamdy jamandap, syrtynan sóz etýdiń qajeti joq. Báribir qosylmaıdy. Túk estimegen adamdaı montıyp otyra beredi» dep kúletinbiz. Ras! Adam degen solaı da tárbıeleıdi eken ǵoı, jan-jaǵyn. Bir adam týraly bir aýyz jaman sóz aıtpastan, eshkimdi sóz etpesten ómir súrý múmkin be, jalpy dep, tańǵalam! Aǵaǵa syryn aıtpaǵan, muńyn shaqpaǵan adam kemde-kem shyǵar?! Sonyń birin de syrtqa shyǵarmaıtyn. Aınalasyna kektený, tistený, bireýden qarymta qaıtarý, jón-josyqsyz ókpe-renish degen atymen joq edi ǵoı, aǵada», deıdi Álııa Qudaıbergen.
О́ldi demeıin, baıyrǵy qazaqtarsha, qaıtty deıinshi
Áý bastan Beısenmen birge kele jatqan ıdeıalas jan dosy, «Jetisý» telearnasynyń endigi dırektory, jýrnalıst Serik Ábikenuly ne deıdi?
«Beıseke: «О́mirdiń sońy – ólim. Kimniń kim ekeni ólgen soń belgili bolady» depsiń. Ekiudaı oıǵa qaldyratyn sóz... О́ldi demeıin, baıyrǵy qazaqtarsha qaıtys boldy, qaıtty deıinshi. Myna ǵalamdy dóńgelek kıiz úıindeı kóretin qazaq ár adam sheńber-súrleýi aıaqtalǵanda óz bastaýyna qaıta oralady deıdi. Seniń jasaǵan jaqsylyq pen jamandyǵyń da sol sheńberdi aınalady, ózińe tımese urpaǵyńa buıyrady, jaqsylyq bolsa shapaǵatqa bóleıdi, jamandyq bolsa mańdaıyn jarady. Babalardyń ótken men bolashaqqa tas atýdan qoryqqany sodan edi. Seniń bireýge tas atqanyń esimde joq, baýyrym. Al jasaǵan jaqsylyǵyńdy, tókken meıirińdi myńdap aıta alamyn. Demek sen óz babalaryńnyń, qaltyraǵan saýsaqtaryn jaıyp bar adamǵa jaqsylyq tileıtin qart anańnyń izinen jańylmaı urpaǵyńa jarqyn, yqylas pen shapaǵatqa bólegen jol siltediń. Áke úshin, azamat úshin budan asqan baqyt bar ma?! Shańyraǵyna qut qondyrǵan er ǵana kópke shýaq shasha alady.
Aıtarym kóp edi, dál osylaı sózden qysylam, tosylam dep oılamappyn. Lyqsyp kelip qysyp tur. Osy shaq pen keler shaqtan bastalatyn sózdiń birden ótken shaqqa ótip ketkeni tilge kúrmeý boldy ma? «Áı, týysqandar, qalaısyńdar?» degen qamshylar lebizińniń jetpeı turǵany-aı. Tildiń sózi toqtap, júrektiń sózi tógiler sátte qysylǵanym... Esbolat Aıdabosyn da tilge sheshen ǵoı: «Kóńilimniń kóshesi bos qalǵandaı, eki dosyńyz sol kóshede terekteı basy teńselip barady», depti seniń qaraly jurt tarqap, qulazyp qalǵan «Araılyńda» tý syrtymyzdan qarap turyp. Ras...
E, Beıseke, azamattyǵy bir bıik, adamdyǵy bir bıik, adaldyǵy bir bıik, Kúreńbelińdeı asqaq jigit ediń ǵoı. Taýdyń kók tasyndaı myqty ekensiń, mort kettiń, úgilmediń. Shyntaǵyńnan demep ár dárigerdiń bosaǵasynan birge attap júrgen Ermek Daýtov dosyń «Aıkıdodan alǵany ǵoı, syr bermedi» dedi. Ras, sporttyń bekzadasy – aıkıdonyń sheberi, Bırankaı Aıkıdo federasııasynyń ókili, ataqty Krıs Mýnıdiń shákirti, birinshi dan ıegeri ekenińdi kóp adam bile bermedi. Jaýynger ónerdiń sardary, talaı jekpe-jekte mereıli bolyp ediń. Aqyrǵy aıqasta da sen jeńdiń. Batqan kúnmen ketken joqsyń. Arda ulǵa qurmet kórseteıik dep aǵylǵan jurtqa eshkim bóget bolmady. Sonysy úshin oblys basshysy Amandyq Ǵabbasuly Batalovqa kóp rahmet! Tutas álemdi tunshyqtyrǵan vırýstyń álegine qaramastan azamattyq jasap, qaraly jıyn ótkizdi. Egilip turyp sóz sóıledi. Jýrnalıske bulaı qurmet kórsetilgeni áriptesterińe, qazaǵyńa, mamandyǵyńa mártebe boldy. Janarbek Áshimjan iniń «Ana tiline» jarııa etip, Jýrnalıster úıine esimińdi berýdi surady. Alty alash tutas qoldap jatyr. Táýelsiz Qazaqstan tarıhynda dál ózińdeı el súıispenshiligine bólengen azamat az. Bir kezderi saýdyraǵan qańqasy ǵana turǵan jańa ǵımarattyń ishine ár kirip, telearna dekorasııalarynyń úzdik úlgide jasalýyna, eldiń túkpir-túkpirindegi arnalar tamsanatyndaı dárejege jetýine seniń qosqan úlesiń ólsheýsiz.
О́mirińniń sońǵy sátine deıin aınalańnyń amandyǵyn tilep jattyń. Halqyńmen baquldasqanda sońǵy sóziń «Rızamyn» bolypty. Sen aǵaıyn týys, súıgen jar, elińe razy bolsań, olar saǵan razy. Bárimiz alaqanmen qalqalap, jantalasa qorǵaǵan Úmittiń álsiz shyraǵy jalp etip sóndi. Biraq onyń sáýlesi talaı júrekte qalyp qoıdy, qaıta mazdaıdy, Beıseke. Shyraǵyń sónbesin».
* * *
Bul juldyzdaı jarqyraǵan Beısen Quranbek týraly maqalanyń basy da sońy da emes. Bul joldar – talantty jýrnalıstiń taǵdyryn túgel qamtı almasy da anyq. Estelik aıtqan, aıtar jandardyń áli de ókinishi men óksigi tarqamaǵandyqtan qazirge áriptesteri aıtar sóz sıpaty osyndaı bolaryn, bolmysyńdy bir maqalaǵa syıdyra almasymyzdy sezgen de edik.
Shyraǵyń sónbesin!
ALMATY
