Bilim • 25 Maýsym, 2020

Qaraǵandylyq túlekti AQSh-tyń tórt oqý orny bilim alýǵa shaqyrdy

Qaraǵandylyq Balnur Túlenovany bir mezgilde AQSh-tyń tórt ýnıversıteti oqýǵa shaqyryp otyr. Ol Nyǵmet Nurmaqov atyndaǵy daryndy balalarǵa arnalǵan mamandandyrylǵan mektep-ınternatty bitirgen, dep jazady Qaraǵandy oblysynyń baspasóz qyzmeti.

Aıym DÁÝIT

"Meniń tulǵa retinde qalyptasýym otbasymda bastaldy. Ata-anam maǵan syn-qaterlerdi qabyldap, qorqynysh jáne kemshiliktermen kúresý úshin qolymnan kelgenniń barlyǵyn jasaý kerek dep tárbıeledi. Bala kezimnen bastap anam men ákem maǵan árdaıym básekelestik sezimimdi joǵaltpaýdy, birinshi kezekte ózimmen kúresýdi, árqashan joǵary deńgeıge shyǵýǵa umtylýdy úıretti. Al ómirlik jaǵdaılar ata-anamnyń maǵan úıretken daǵdylaryn damytýǵa, meniń jeke basymnyń qalyptasýyna jáne kim bolǵym keletinin túsinýge múmkindik bergen serpin berer shart bolǵandaı", deıdi Balnur.

Boıjetken orys, qazaq, fransýz, aǵylshyn jáne túrik tilderin meńgergen. Ony ekonomıka, áleýmettaný jáne jaratylystaný ǵylymdary qyzyqtyrady.

"Sheteldik ýnıversıtetter bolashaq stýdentterdiń ózindik damýyna, motıvasııasyna, ishki sıpaty men dúnıetanymyna úlken mán beredi. Meniń motıvasııalyq hatymdy oqyp, olar tań qaldy. Bes tildi bilýden basqa, men filmmaking and photography-men, sondaı-aq ekologııalyq jobalarmen aınalysamyn, matematıka boıynsha olımpıadalarǵa qatystym. Meniń aınalysatyn jáne oqıtyn dáristerimniń tizimi aýqymdy. Oqýdan tys sabaqtar men qyzyǵýshylyqtar meniń daralyǵymdy ashady. Ýnıversıtetter tulǵa retinde qalyptasyp kele jatqan jastardy izdeıdi. Mende armandarymdy júzege asyrý úshin jetkilikti kúsh, bilim jáne múmkindikter bolýyn qalaımyn. Bolashaqta óz bıznes-jobalarymdy júzege asyrǵym keledi", dedi Balnur Týlenova.

10-shy synypta ol Halyqaralyq emtıhan tapsyryp, nátıjelerin álemniń túrli elderiniń ýnıversıtetteriniń jalpy bazasyna jibergen. Kóp kútpesten oǵan oqýǵa shaqyrý keldi.

Balnur Rod-Aılend shtatynyń ýnıversıtetine toqtaldy. Bul oqý ordasynda bilim alý quny jylyna 80 myń AQSh dollaryna deıin turady. Sátti tapsyrylǵan emtıhandar qaraǵandylyq túlekke tegin oqýǵa múmkindik beredi.

Bilim alyp, Balnur halyqaralyq kompanııalarda jumys tájirıbesin jınaqtaýdy josparlap otyr. Sodan keıin óz isin ashyp, el ekonomıkasyn qoldaý úshin Qazaqstanǵa oralmaq.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz