Túngi saǵat 01:00 shamasynda Qarasaı aýdany PB-niń kezekshi bólimine Shamalǵan aýylynyń 72 jastaǵy turǵyny túngi ýaqytta onyń 21 jastaǵy qyzyn terezeden urlap ketkendigi týraly aryzdanǵan. Ol belgisiz bireýdiń terezeni buzyp, kúsh qoldaný qaterin tóndire qyzyn belgisiz baǵytta alyp ketkenin jetkizgen.
"Jedel-izdestirý is-sharalarynyń nátıjesinde polısııa qyzmetkerleri “LEXUS 470” avtokóligin Qaskeleń qalasynan toqtatqan. Kólikte 21 jastaǵy boıjetken jáne ony urlady degen kúdikke ilingen Shalqar aýylynyń turǵyny bolǵan. Boıjetkenniń buǵan deıin aıyrylysyp ketken jigitiniń túngi ýaqytta qysqysh arqyly shegelermen bekitilgen terezeni buzyp, úıge kirip, dóńgelekti jóndeý úshin paıdalanylatyn shılanyń kómegimen boıjetkendi qorqytyp, ony urlap ketkendigi anyqtaldy. Kúdiktini tártip saqshylary ustaǵanǵa deıin adam joq jerlerde birneshe ret toqtap, qyzǵanysh saldarynan, boıjetkendi qolymen jáne aıaǵymen soqqyǵa jyqqan", – dep habarlaıdy Almaty oblysy Qarasaı aýdandyq polısııa basqarmasynyń bastyǵy Ashat Danııar.
Kúdikti adam ýaqytsha ustaý oqshaýlaǵyshyna qamaqqa alyndy. Odan alynǵan spıraldi shılo men terezeden tabylǵan qysqyshtar iske aıǵaqzat retinde tirkeldi. Keltirilgen dene jaraqattarynyń aýyrlyq dárejesin anyqtaý maqsatynda sot-medısınalyq saraptamasy taǵaıyndaldy. Atalǵan derek QR QK 125-baby “Adam urlaý” boıynsha tirkelip, sotqa deıingi tergeý amaldary júrgizilip jatyr.
