Densaýlyq saqtaý basqarmasynyń málimetinshe, oblysta koronavırýs ınfeksııasyn juqtyrǵan 740 adam anyqtalǵan, 370 adam indetten jazyldy. Qazir barlyq emhana men aýrýhana, jedel járdem stansasy qalypty rejimde jumys isteýde. Sońǵy kúnderi naýqastanǵan 30 adam oblys ortalyǵynan bolsa, 1 adam – Ekibastuz qalasynyń turǵyny. Naýqastar qalalyq ınfeksııalyq aýrýhanalarǵa jatqyzylǵan, jaǵdaılary qalypty, hattamaǵa sáıkes em taǵaıyndaldy, baılanysta bolýy múmkin adamdar toby anyqtaldy.
Al aýdandardaǵy emdeý oryndarynda 2 myń adam ornalastyrylǵan. Qosymsha oryndar aýdandyq ortalyq aýrýhanalarda ashyldy. О́tken táýlikte óńirlik stasıonarlarǵa 531 adam medısınalyq kómekke júgindi. 285 pasıentte pnevmonııa, 180 adamda JRVI anyqtalǵan. Barlyǵy 1429 adam pnevmonııa jáne 196 adam JRVI dıagnozymen jatyr. Aýdandyq aýrýhanalarda medısınalyq personalǵa júkteme az bolǵandyqtan, kadrlar tartý boıynsha tıisti sharalar qabyldandy. Jergilikti bıýdjet esebinen qosymsha qonaqúılerde tamaqtaný jáne turý úshin tıisti qarajat bólindi.
Pandemııa bastalǵan sátte Pavlodar qalalyq №3 aýrýhanasynda ýaqytsha qaraý mekemesi retinde 385 oryn ashyldy. Sondaı-aq kardıoortalyq ǵımaratynda 135 oryn ashyldy. G.Sultanov atyndaǵy oblystyq aýrýhanada 282 oryn daıyndaldy. Keshe qalalyq №1 aýrýhanada qosymsha 200 ýaqytsha qaraý orny ázirlendi. Dárilerdiń qaı dárihanalarda bar ekeni jónindegi aqparat qalalyq ákimdiktiń Instagram paraqshasynda jarııalanady.
– Qosymsha oryndar ashý arqyly provızorlyq tósek sany 1232-den 1672-ge deıin ósti. Eger buryn sımptomdary koronavırýs ınfeksııasyn joqqa shyǵarmaıtyn barlyq pasıent Pavlodar, Ekibastuz jáne Aqsý qalalaryndaǵy provızorlyq stasıonarlarǵa jatqyzylsa, endi aýyl turǵyndary COVID-19 kúdigi bolǵan jaǵdaıda ortalyq aýdandyq aýrýhanalarǵa ornalasady. Ár aýdanda provızorlyq tósek-oryndar ashyldy nemese provızorlyq karantındik tósek-oryn retinde qaıta beıimdeldi. Mysaly, Sharbaqty aýdandyq aýrýhanasynda 100 tósek-oryn ashyldy. Taǵy bir 160 oryndyq provızorlyq gospıtal balalardyń týberkýlezge qarsy shıpajaıynda daıyndaldy.
Oblys ákimi Ábilqaıyr Sqaqov óńir turǵyndaryna jeke paraqshasynda jıi úndeý jarııalap, karantın sharalaryn berik ustanýǵa jáne dárigerlerdi qoldaýǵa shaqyrady. Sondaı-aq oblystyq densaýlyq saqtaý basqarmasy basshylyǵymen jáne aýrýhanalardyń bas dárigerlerimen onlaın rejimde epıdemııalyq jaǵdaıdy talqylap, qajetti sharalar josparyn qabyldady.
«Árqaısymyz sebepsiz dalaǵa shyǵa bermeı, adamdar kóp shoǵyrlanǵan jerden aýlaq bolyp, barlyq qaýipsizdik sharalaryn ustanatyn bolsaq, aýrýdyń taralýyn báseńdetemiz. Úıde qalǵan bir kún sizdi aýrýhanadaǵy eki aptadan saqtaı alady. Karantındi kúsheıtý – bul qajetti shara. Karantındi kúsheıtý adamdardyń kóptep jınalýyn boldyrmaýdyń jalǵyz joly bolyp kórinedi. Karantın sharalaryn adamdar óz densaýlyqtaryna nemquraıly qaramaı, barlyǵyna túsinýshilik tanytqan jaǵdaıda ǵana toqtatýǵa bolady», dedi oblys ákimi Á.Sqaqov.
Pavlodar oblysy
