Dese de tuńǵysh Olımpıada chempıonymyzdyń izin jalǵap, Áljan baǵyndyrǵan shyńǵa jetý úshin baryn salyp júrgen sportshylarymyz da bar. Solardyń biri – «100 jańa esim» jobasynyń jeńimpazy Rústem Erǵalı. Keıipkerimiz basketboldan Qazaqstannyń 13 dúrkin chempıony atanyp, 15 jyl boıy ulttyq qurama kapıtany bolǵan.
Qostanaı qalasynda dúnıege kelgen Rústem 10 jasynan bastap basketbol sportynyń qyr-syryna qanyǵa bastaǵan. Komandadaǵy qaratory jigitti barlyǵy Djekson dep ataıtyn. Ulttyq basketbol assosıasııa oıynshylarynyń ishinde Rústem kóp jyldar boıy Lebron Djeımsti úlgi tutyp, onyń oıyn mánerine erekshe tánti bolǵanyn aıtady.
– Basketboldy eń alǵash teledıdardan kórgenim esimde. Shamamen 1996 jyl bolýy kerek. UBA oıyndaryn kórip, sporttyń osy túrine ańsarym aýa bastady. Meni ásirese, Lebron Djeımstiń oıyny tánti etti. Sol sportshyǵa uqsaǵym kelip, esh oılanbastan basketbol úıirmesine jazyldym. Basketbolmen qatar taǵy birneshe sport túrimen shuǵyldanyp kórdim. Olardyń qatarynda boks, tennıs, voleıbol da boldy. Biraq túbi basketbolǵa qaıta aınalyp keldim. Anama sońǵy sheshimimdi aıtyp, basketbolǵa toqtaǵanymdy jetkizdim. Alǵash úıirmege baryp júrgende jattyǵýǵa bir kún keshigip qalǵanym úshin bapkerim meni úıirmeden shyǵaryp jiberdi. Keıin anammen Olımpıada rezerviniń mamandandyrylǵan balalar men jasóspirimder mektebine bardym. Olar meni birden qushaq jaıa qarsy alyp, kelesi aptada komandamen birge Qazaqstan chempıonatyna attanyp kettim. Endi myna qyzyqty qarańyz, sol jarysta bizdiń komandamyz birinshi oryn alsa, men birinshiliktiń úzdik oıynshysy atandym. Osydan keıin meniń basketbol álemindegi saparym bastaldy desem de bolady.
Jastaıynan talantymen, erekshe darynymen mamandardyń kózine túsken Rústem eresekter arasyndaǵy sporttyq mansabyn 2002 jyly elordanyń «Astana Taıgers» komandasynda bastady. Shabýyldaýshy-qorǵaýshy pozısııasynda oınaǵan ol 2011 jyly «Astana» prezıdenttik basketbol klýbyna aýysyp, byltyr karerasyn osy komandada aıaqtady.
Keıipkerimiz 17 jyldyń ishinde 13 ret Ulttyq chempıonattyń jeńimpazy jáne 11 ret Qazaqstan kýbogynyń ıegeri atandy. Sonymen qatar ol Qazaqstannyń erler quramasynyń turaqty múshesi boldy jáne Azııa kýbogy men Álem kýbogy sııaqty birneshe iri halyqaralyq týrnırlerde baq synady.
«Astana Taıgers» komandasynda júrip Rústem Erǵalı 2004 jáne 2010 jyl aralyǵynda alty ret el chempıony atansa, «Astana» klýbynda taǵy jeti ret Qazaqstan chempıony degen mártebeli ataqqa ıe boldy. Tek bir ret 2015/2016 jylǵy maýsymda chempıonatty ekinshi orynmen aıaqtap, kúmis medal oljalady. Al «Astana Taıgers» quramynda júrgende 2003/2004 jylǵy el chempıonatynyń qola júldesin ıelendi. Bul Rústemniń el chempıonatyndaǵy alǵashqy júldesi edi.
– Jalpy, jetistikke jetýimniń eshqandaı syry, eshqandaı qupııasy joq. Adam jetistikke jetý úshin tynbaı eńbek etýi kerek. Sonymen qatar óz isin súıip, mahabbatpen istese túbinde bıik shyńdy baǵyndyrady dep esepteımin. Mysaly, men basketbol sportyn jan-tánimmen súıdim. Kúni-túni jattyǵý jasadym. Sonyń arqasynda osyndaı jetistikke jettim. Chempıondyqtyń syry – osy ǵana.
Rústemniń aıtýynsha, elimizde sporttyń basqa túri sııaqty basketbol da bir orynda turmaı, kún ótken saıyn damyp, alǵa jyljyp keledi. Sonyń dáleli retinde ol Qazaqstan quramasynyń álem chempıonatyna shyǵýyna bir taban jaqyn qalǵanyn aıtty. «Bizge tek sáttilik jetpeı qaldy. Áıtpese bir aıaǵymyzben álem chempıonatynda tur edik. Eger elimizde basketboldyń damýy nashar bolsa, álem birinshiliginiń irikteý kezeńine de qatysa almaıtyn edik. Sonymen qatar AQSh jáne Eýropa quramalary sekildi álemniń aldyńǵy leginde bolmasaq ta, Azııa qurlyǵynda ózimizdiń laıyqty ornymyz bar. Bir sózben aıtqanda, biz durys baǵytta damyp kelemiz», deıdi ol.
Sondaı-aq keıipkerimiz sportty damytýdyń tetigin basqa jaqtan izdeýdiń qajeti joq deıdi. Tek jastardyń osy sportpen aınalysýyna múmkindik jasap, zaman talabyna saı sport keshenderin salý kerek ekenin aıtady. «Qazirgi tańda talapqa saı sport keshenderi Nur-Sultan men Almaty qalasynda ǵana bar. Mundaı dástúrdi óńirlerde jalǵastyryp, aýyldarda balalar úıirmesin ashý kerek. Talanttyń kóbi aýyldan shyǵady jáne sol talantty kóre bilý kerek», deıdi Rústem.
Búginde Rústem Erǵalı «Astana» basketbol klýbynyń atqarýshy dırektory. VTB Biryńǵaı lıgasynda baq synaıtyn komandamyz jankúıerler tarapynan kóp synǵa ushyrap jatady. Basty sebep – atalǵan lıgadaǵy súreńsiz oıyny. Biraq Rústemniń pikirinshe jankúıerlerdiń syny orynsyz.
– Menińshe, «Astananyń» VTB Biryńǵaı lıgasynyń pleı-off kezeńine shyqqan 15 komandanyń qatarynan kórinýiniń ózi úlken jetistik. Munda bıýdjeti jaǵynan bizden eki, tipti úsh ese joǵary komandalarmen oınaımyz. Soǵan qaramaı bizdiń jigitter namysqa tyrysyp, aty dardaı SKA, «Hımkı» sekildi komandalarmen terezesi teń dárejede óner kórsetip keledi. Shaǵyn bıýdjetpen jáne eń jas komanda bola tura, joǵaryda ataǵan komandalarmen bir deńgeıde oınaýymyzdyń ózi joǵary jetistik.
Qazir álemdik komandalardy legıonersiz elestetý múmkin emes. Kez kelgen sport túrin alyp qarasańyz, onda syrttan kelgen kemi eki-úsh oıynshy júredi. Mysaly, myqty dep júrgen AQSh komandalarynyń ózinde Eýropanyń, Azııanyń jigitteri oınaıdy. Rústem de elimizdegi komandalarda legıonerlerdiń bolýy zańdy dep sanaıdy.
– Komandalarǵa legıoner tartý búkil álemde bar tájirıbe. Sondyqtan bul qalypty jaǵdaı, oǵan úrke qaraýdyń qajeti joq. Qaıta munyń bizge oń áseri bar. О́ıtkeni basketboldan AQSh mektebiniń shoqtyǵy bıik. Sol jaqtan kelgen jigitter osy sporttyń qyr-syryn bizdiń sportshylarǵa úıretip, tájirıbesimen bólisedi. Sondaı-aq sen sportshy retinde qalyptasyp, ósýiń úshin básekelestikke daıyn bolýyń kerek. Báseke bar jerde ósý bar ekeni aıtpasa da túsinikti. Legıoner sanyn azaıtý kerek dese, oǵan kelisemin. Biraq qazir álemde legıonersiz oınaıtyn komandany kezdestirý óte qıyn, – deıdi Rústem.
