О́ner súıgen basshy – halyq baılyǵy

Taǵdyrdyń talaı-talaı teperishin kórip, san taraý joldan ótken elimizdiń ómiri azattyq deıtin aıaýly uǵymmen qaıta túledi. Sol tusta el tizginin qolyna alǵan Elbasymyz syndarly sheshimder jasap, táýekeldi qadamdarǵa bara bildi. Shekaramyz shegendelip, irgemiz bekı tústi. Jumyr jerdiń betindegi qazaq deıtin qasıetti halyqty tutas álem tanydy. Máde­nıet, bilim, ekonomıka, sport syndy ult aıbarynyń temirqazyǵyna balanatyn san sa­lada tolaıym tabystarǵa qol jetkizdik. О́sh­kenimiz jaǵylyp, joǵalǵanymyz tabyldy. Munyń bári jaıdan-jaı kele qalǵan joq. Qajyrly eńbek, berik ustanym, kóregen she­shimder asqaq armanǵa qanat baılady. Bul je­­tistikter tikeleı Elbasynyń aıshyqty eń­­be­gimen astasyp, sabaqtasyp jatyr. Nıeti du­­rys, kóńili oıaý jurt muny kórmeýi múmkin emes.

 Nursultan Nazarbaev eldiń mádenı ómirin órkendetýge eren eńbek sińirdi. Tuńǵysh Pre­zıdent tusynda «Halyq – tarıh tol­qy­nynda», «Mádenı mura», «Rýhanı jańǵyrý» syndy ultymyzdyń tarıhy men ónerin, má­denıeti men salt-dástúrin jańǵyrtýǵa ar­nalǵan memlekettik baǵdarlamalar qolǵa alyndy. Olardyń iske asýy kıno men teat­r, dástúrli mýzyka men sáýlet, beıneleý óner­lerinde tyń serpilis jasady.

Ol kisi óner men bilimge baı adam. Bul óz kezeginde óner adamdaryna úlken qol­daý boldy. Ýaqyttyń aǵysyn, zamannyń jyldam­dyǵyn sezip otyratyn zerdeli jan qanshama talantty azamattyń óneri men ómiriniń óris­teýine jaǵdaı jasady. «О́ner súıgen patsha – halyq baılyǵy» degen sóz bar. Bir joly qasıetti qarashańyraǵymyz «ákem-teatrǵa» arnaıy kelip, jıyrma jas ártisimizge páter kiltin úlestirip edi. Bul tarıhta bolmaǵan nárse. Ult­tyń mádenıetin qoldaý – halyqtyń bola­sha­ǵyn oılaý. Sondyqtan men júrgen jerimde Elba­synyń osy bir kóregendi isin únemi aıtyp júremin.

Qazaqtyń bolmysynda arazdasqandy tatýlastyrý deıtin jaqsy qasıet bar. Men osynaý qundylyqtyń óreli órnegin, saltanatty úlgisin Elbasymyzdyń is-áreketinen baǵamdap, naǵyz qazaqtyń qasıet-qalybyn boıyna darytqan jan dep paıymdaımyn. Bir ǵana mysal aıtaıyn. Baýyrlas túrik aǵaıyndar men Reseı arasynda tutanǵan alaýyzdyqty aýyzdyqtaýǵa ol kisi qomaqty úles qosty. Qos eldiń prezıdentterin bitimgerlikke shaqyryp, álemge ozyq úlgi kórsetti. Osy jaǵdaıdan keıin Túrkııa men Reseıdiń memleket basshylarynyń bir-birine degen renish tońy jibip, úlken qaýip der kezinde seıildi. Kúni búgin eki memlekettiń halqy osy bir salıqaly isi úshin Nursultan Nazarbaevqa dán rıza. Sebebi aradaǵy bul shıelenis ýshyǵyp keter bolsa, eki memlekettiń de ekonomıkasyna salqynyn tıgizer edi. Tipti soǵys órti tutanyp ketýi de yqtımal-tuǵyn.

Halyqaralyq dıplomatııa asqan jaýap­kershilikti talap etetin tym názik sala. Sabaǵyn úzip alsań, qaıtyp ornyna keltirý múmkin emes. Álem kún saıyn ózgeriske ushyrap otyr­ǵan almaǵaıyp dáýirde munyń bárin dál tarazylaý parasaty men paıymy, aqyly men bilimi kemel basshynyń ǵana qolynan keletin sharýa. Jer-jahanǵa memlekettiń beıbit já­ne ıadrolyq qarýsyz saıasatyn pash etip, bas­qalardy da osy joldy ustanýǵa shaqyrý arqyly keńdik pen kemeldiktiktiń kórkem úlgisin kórsetti. Kópultty Qazaqstannyń yn­ty­maǵy men tatýlyǵyn nyǵaıtty. Mem­leke­timiz birlik pen qoǵamdyq kelisimniń altyn uıasyna aınaldy. Bul turǵydan alǵanda da Tuńǵysh Prezıdentimizdiń qaıratkerlik joly talaılarǵa jaqsy úlgi. Halqymyzdy tanym men taǵylymǵa shaqyrǵan tyń bastamalar áli de jalǵasa bergeı.

Asqan asý, attaǵan beles tarıh deıtin uly kitapqa óshpesteı bolyp qashaldy. Qoǵam bolǵannan keıin, adamdar júrgen ortada qısyndy-qısynsyz túrli pikirler aıtyla beredi. Táı-táı basqan jas memleketimizdiń ótkeni men búginin ádil tarazylaıtyn halqymyz jarqyraǵan jaqsylyqty, osynaý jyldardyń bederindegi shýaqty shaqtardy kóre bilse ıgi.

Mereıli seksen jasqa tolyp otyrǵan tolaǵaı tulǵaǵa temirdeı berik densaýlyq tileı­min. Syrqattanyp qaldy degendi estip: «Janyp turǵan ottyń ishinen shyqqan azamat qoı, bul synaqtan súrinbeı óter» dep edim. Kóptiń tileýimen deneni dendegen keselden qulan taza aıyqty degende shyn qýandyq. Qazaq deıtin qaraorman halyqtyń armanymen astasqan, jyrtyǵyna jamaý bolǵan jigerli jan áli de el úshin eleýli qadamdarǵa baryp, memleketimizdiń órkendeýi jolynda eńbek ete beredi dep senemiz. Asylymyzdy ardaqtaıyq, jaqsymyzdy qurmetteıik. Qa­zanat­tarymyz tuǵyrly, azamattarymyz ǵumyr­ly, táýelsizdigimiz baıandy bolǵaı!

Sábıt ORAZBAEV,

Qazaqstannyń halyq ártisi