Memlekettiń bul baǵyttaǵy jaýapkershiligi men maqsat-mindetteri saıası-ekonomıkalyq, mádenı-rýhanı, áleýmettik salalardy damytý, halyq densaýlyǵyn saqtaý, nyǵaıtý isine tikeleı qatysty. Sondyqtan elimizdiń Ata Zańynda qorshaǵan ortany qorǵaý memlekettiń basty maqsaty ekeni anyq jazylǵan.
Búginde halyqtyń ekologııalyq mádenıetin kóterý, demalys oryndary retinde keńinen tanylǵan aýmaqtardaǵy keleńsiz kórinister qorshaǵan ortany qorǵaý salasyndaǵy ózekti máselelerdiń bir bóligi retinde atalyp júr.
Elimizdegi ekologııalyq túıtkilderdi eńserýge qol jetkizý – memleketimizdiń turaqtylyǵy men ornyqty damýynyń negizgi alǵysharttarynyń biri ekenin jaqsy bilsek te saladaǵy sebep-saldarlary san alýan keleńsiz kórinisterdiń jolyn kesýge asyǵar emespiz nemese «odan keler pále joq» degendeı mán berer túrimiz joq.
Jalpy, ekologııamyzǵa qatysty sóz qozǵalǵanda birinshi kezekte irili-usaqty kásiporyndardan, túrli óndiris oryndarynan, jylytý stansalarynan, avtokólikterden jáne taǵy basqa kózderden shyǵyp jatqan ýly, zııandy zattardyń teris áseri jóninde kóbirek aıtylady. Al halyqtyń, sanaly azamattarymyzdyń tarapynan qorshaǵan ortamyzǵa jasalyp jatqan qastandyq pen aıarlyq týraly sózge sarańbyz. Negizinde, qazirgi tańda aqparattyq keńistiktegi ekologııa salasyna qatysty habarlardyń syńaıyna qarap otyryp, qorshaǵan ortamyz zaýyttar men fabrıkalardan, tehnıkalyq basqa da kózderdiń zalalynan góri turǵyndardyń kúndelikti tirshiligindegi jónsiz is-áreketi, durysy ekologııalyq mádenıetiniń tómendigi kesirinen kóbirek zııan shegip otyrǵandaı áserde qalasyz. Eger, jańa tehnologııa kómegimen eki taraptyń tabıǵatqa tıgizip otyrǵan zardabyn salystyra eseptep shyǵarar bolsa, bizdiń álgi áserimiz shyndyqqa jaqyndaý bolýy da múmkin.
Bizdiń bulaısha taýsyla sóıleýimizdiń kóp sebepteriniń biri – basqany bylaı qoıǵanda, elimizdiń brendi sanalatyn, Qazaqstannyń eń kórikti óńirleri týraly aıtylǵanda aldymen oıǵa oralatyn, memleketimizdegi tanymal demalys oryndarynyń aldyńǵy qatarynda turǵan, týrısterdi kóptep tartýǵa múmkindik beretin biregeı aımaqtardaǵy óreskeldik. Kórikti jerlerimizdiń ózinde kóńilsiz kórinis beleń alyp otyrǵanda, basqa mekenderdegi jaǵdaılar jóninde sóz qozǵaý ońaı bolmas.
Máselen, jaqynda Senattyń Nurtóre Júsip bastaǵan bir top depýtaty Úkimet basshysy Asqar Mamınge joldaǵan depýtattyq saýaldarynda týǵan jerimizdiń qasıeti, ony qurmetteý, qorǵaý azamattyq borysh, eldik paryz ekenin aıta kelip: «Býrabaıǵa barǵanda biz ne kóremiz? Qaptaǵan qoqys... Shashylǵan zattar... Plastıkalyq bótelke, ýmajdalǵan paketter... Kóldiń sýy las... Qandaı keremet demalys aımaǵy! Qadirin nege bilmeımiz? Tek qana Býrabaı emes, Qazaqstannyń kez kelgen óńirine barsańyz – ne kóp, qoqys kóp. Tastaıtyn da ózimiz, lastaıtyn da ózimiz! Bul neden? Týǵan tabıǵatymyzdy aıalap kúte almaıtyndaı basymyzǵa ne kún týdy?» degen suraqty kóldeneń tartty. Talaıdyń kókeıinde júrgen suraq. Bul tek Úkimetke ǵana emes, Qazaqstannyń árbir azamatyna qoıylyp otyrǵan saýal ekenin uǵýymyz kerek.
Qazaq týǵan jerin, onyń tamyljyǵan tabıǵatyn anaǵa balaǵan. Endeshe, nege biz óz anamyzǵa ógeılik kórsetemiz?.. Bizge ata-babalarymyz tabıǵatty aıalaýdyń, ony qasterleýdiń salty men ǵurpyn mıras retinde qaldyryp, onyń mańyzdylyǵyn barynsha túsindirip ketken. Sondyqtan tabıǵatty qorǵaý jóninde ózgeden aqyl surar jaıymyz joq. Biraq bir ókinishtisi, nıetimizdi buzyp alǵanbyz. Al buzylǵan pıǵylymyzdy jaqyn arada jaıshylyqpen túzeı almasaq, onda osy baǵytta ishki ister salasy qyzmetin jandandyrý, qorshaǵan ortany qorǵaý boıynsha tıisti memlekettik mekemelerdiń is-qımylyn arttyrý, osy jumystyń ádis-tásilderin jetildirý kerek. Sonymen birge tabıǵatty qorǵaý polısııasynyń bedelin arttyryp, olardyń qyzmetin jandandyrýǵa basymdyq berilse, qanekı.
Tabıǵat – bizdiń anamyz! Olaı bolsa, oǵan jábir kórsetýshiniń jazasy qatań bolýy tıis. Sonda ǵana májbúrli túrde bolsa da qorshaǵan ortaǵa degen durys nıetimiz qalyptasady. Jaqsylyqqa bet burýǵa zańmen májbúrleý áreketin eshkim jónsiz dep aıta almaıdy.
