38 jastaǵy Brendon Bochenskı AQSh-tyń Mınnesota shtatyndaǵy Bleın qalasynda 1982 jyly dúnıege kelgen. Sol jerde shaıbaly hokkeı óneriniń qyr-syryna qanyǵyp, sporttyq karerasyn jergilikti «Bleın Bengals» klýbynan bastaǵan. Keıinnen Kanadanyń «Ottava Senatorz» komandasynda óner kórsetip, bir jyldan soń eline oraldy. Al 2010 jyly Qazaqstanǵa qonys aýdaryp, tabany kúrekteı 10 jyl «Baryspen» tabysty nátıje kórsetý úshin baryn saldy. Astanaǵa kele salyp Bochenskı «Barystyń» úzdik surmergeni atanyp, jankúıerlerdiń súıikti oıynshysyna aınaldy. Elorda komandasymen birge ol QHL-diń Chernyshev dıvızıonynda top jaryp, Gagarın kýbogy jolyndaǵy jarystyń ekinshi pleı-off kezeńine deıin jetti.
Bochenskı 2015 jyly Qazaqstan azamattyǵyn qabyldap, ulttyq quramamen birge álem chempıonaty men Olımpııa oıyndaryna irikteý matchtaryna qatysyp, talaı belesti baǵyndyrdy. 2019 jyly karerasyn aıaqtap, sportpen qosh aıtysqanyn málimdedi. Sol jyldyń jeltoqsan aıynda «Barys» óziniń úzdik surmergenine laıyqty qurmet kórsetip, jeıdesin «Barys Arenanyń» tórine ildi.
