Shet elderdiń jibergen gýmanıtarlyq kómegin Syrtqy ister mınıstrligi men Densaýlyq saqtaý mınıstrligi birlese kútip alǵan.
"Indet taraǵan kezden bastap syrtqy halyqaralyq áriptesterimizden tıisti qaıyrymdylyq kómekti elge jetkizý jumystaryn júrgizip kelemiz. Bul jumys óte aýqymdy. Árıne, osy oraıda eń aldymen áriptesterimiz – QHR, AQSh, Reseı, BAÁ, Japonııa, Túrkııa, Ońtústik Koreıa, Katar, О́zbekstan jáne kóptegen basqa da elderge, DSU sııaqty halyqaralyq uıymdarǵa, kompanııalarǵa, sheteldik qaıyrymdylyq qorlaryna, jekelegen azamattarǵa elimizge jasaǵan qaıyrymdylyq kómekteri úshin shynaıy rızashylyǵymyzdy jetkizgim keledi. Jalpy, Qazaqstanǵa gýmanıtarlyq kómek bergen elderdiń sany 15-ten asady", - dedi Erjan Ashyqbaev.
Syrtqy ister mınıstriniń orynbasary elge kelgen gýmanıtarlyq kómektiń jalpy somasyn ataǵan joq. Biraq, gýmanıtarlyq kómekke baılanysty birneshe faktorlarǵa erekshe toqtaldy.
"Birinshiden, indet jahandyq bolǵannan keıin biz jumysymyzdy, ıaǵnı, dári-dármek satyp alý nemese shetelden qajetti medısınalyq qurylǵylardy, zattardy ákelý máselesin dúnıejúzindegi úlken básekelestik jaǵdaıynda iske asyryp jatyrmyz. Sondyqtan muny eskergen jón. Ekinshiden, gýmanıtarlyq kómek qanshalyqty aýqymdy bolsa da, eń aldymen, eń úlken júk Úkimetimizge, respýblıkalyq bıýdjetke túsip otyr. Biraq, eń úlken jaýapkershilik júgi Densaýlyq saqtaý mınıstrligine, densaýlyq saqtaý júıesindegi áriptesterimizge túsip otyrǵany anyq. Jalpy, elimizge gýmanıtarlyq júk retinde 5 mln 200 myńǵa jýyq medısınalyq maska, 98 О́kpeni jasandy jeldetý apparaty, 260 myń test júıesi, 3000 myńǵa jýyq teplovızor men termometr ákelindi", - dedi ol.
