Eraly Toǵjanov elordadaǵy medısına mekemelerin aralady

Premer-Mınıstrdiń orynbasary barǵan alǵashqy nysan ambýlatorlyq-emhanalyq jáne stasıonardy almastyratyn kómek kórsetetin, sondaı-aq jedel medısınalyq járdem shaqyrtýlaryna qyzmet kórsetetin №9 qalalyq emhana boldy. Búgingi tańda emhanada 95 myń turǵynǵa qyzmet kórsetiledi.  

Pandemııa kezinde emhanada fıltr-kabınetter men provızorlyq bólim uıymdastyryldy, bul jerlerde PTR-zertteý úshin bıomaterıal alynyp, sondaı-aq qajetti em taǵaıyndalady.  

Sonymen qosa, Vedomstvoaralyq komıssııa basshysy Damumed mobıldi qosymshasy arqyly iske qosylǵan pasıentterdi tegin onlaın-qabyldaýdyń jumysymen tanysty. Qazirgi kezde 19 uıym osy qyzmetke qosylǵan. Bolashaqta Nur-Sultan qalasyndaǵy 31 medısına uıymy onlaın-konsýltasııalar júrgizetin bolady.  

Budan ózge, emhanada jedel járdemge túsetin júktemeni joıý maqsatynda bes mobıldi brıgada uıymdastyrylǵan. Bul mobıldi toptar COVID-19 jáne pnevmonııamen syrqattanýǵa kúmándi naýqastarǵa úıde qyzmet kórsetedi, dárigerler tekserip, PTR-zertteýden ótkizý úshin bıomaterıal alynady jáne qajetti em taǵaıyndalady.

Sonymen qatar, E. Toǵjanov jedel medısınalyq járdem qalalyq stansııasyna bardy. 2016 jyldan beri stansııada kepildendirilgen tegin medısınalyq qyzmet kólemi aıasynda aýrýhanaǵa deıingi shuǵyl medısınalyq kómek kórsetiledi. Qazirgi kezde munda 1 414 medısına qyzmetkeri jumys isteıdi, 80 brıgada men 124 avtokólik quraly bar.

Aıta keteıik, búgingi tańda jedel járdem kómegine júginetinderdiń sanynyń azaıǵany baıqalyp otyr. Eger 22 maýsymda oǵan táýligine 4,3 myń adam júginse, 16 shildede 1,9 myń adam júgingen. Onyń ishinde KVI boıynsha júginý sany táýligine 500-den 254-ke deıin tómendegen. Jedel járdemdi shaqyrtýlar sany táýligine 3 myńnan 1,3 myńǵa deıin qysqarǵan.

Premer-Mınıstrdiń orynbasary E. Toǵjanov budan basqa №2 qalalyq kópsalaly aýrýhananyń jumysymen tanysty, bul aýrýhana pasıentterdi barlyq beıinder boıynsha qabyldaıtyn birden-bir emhana bolyp otyr. Aýrýhana jedel medısınalyq kómek boıynsha da, adamdardyń ózdiginen júginýi boıynsha da táýlik boıǵy rejımde pasıentterdi qabyldaýdy qamtamasyz etedi. Táýlik ishinde orta eseppen 300-ge jýyq pasıent munda júginedi — 200 adam jedel medısınalyq járdem boıynsha, 100 adam ózdiginen júginý jáne emhanalardan baǵyttalýy boıynsha.

Sonymen qatar aýrýhanada koronavırýs ınfeksııasymen aýyrǵandarǵa arnalǵan 30 ınfeksııalyq tósek-oryn, sondaı-aq jansaqtaý bóliminde qajetti medısınalyq jabdyqtarmen, onyń ishinde О́JJ apparattarymen jaraqtalǵan 9 tósek-oryn bar.  

Nur-Sultan qalasyndaǵy №2 kópsalaly aýrýhananyń mamandarynyń shtaty 1700-den asa joǵary bilikti qyzmetkerdi qamtıdy, onyń ishinde 500 — dáriger. Aýrýhanynyń 200-den asa qyzmtkeri aýyrǵan, onyń ishinde 150 adam saýyǵyp, jumysyna oralǵan.  

Medısına qyzmetkerlerimen kezdesý kezinde E. Toǵjanov medısına qyzmetteriniń barlyq qyzmetkerlerine alǵys bildirip, olardyń kúndelikti eren eńbegin atap ótti jáne olardy búgingi kúnniń qaharmandary dep atady.

Sonymen qosa, Premer-Mınıstrdiń orynbasarymen áńgimelesý kezinde dárigerler áriptesteriniń atynan medısına qyzmetkerlerine ústeme aqy tóleýge qatysty alańdaýshylyqtaryn bildirdi, bul máselege qatysty E. Toǵjanov medısına qyzmetkerlerine barlyq qajetti tólemder tolyq kólemde aýdarylatynyna sendirdi.

Sonymen qatar, medısına mekemelerin dárilik preparattarmen odan ári qamtamasyz etý máselesi talqylandy. Búgingi tańda medısına mekemeleri dárilik zattarmen 100% qamtamasyz etilgen. Vedomstvoaralyq komıssııanyń basshysy Densaýlyq saqtaý mınıstrligi men "SK-Farmasııa" JShS-ǵa elimizidń barlyq medısına mekemelerinde dárilik preparattardyń aılyq qoryn qamtamasyz etýdi tapsyrdy.

Elordadaǵy stasıonarlardyń júktemelenýi ótken aımen salystyrǵanda salystyrǵanda 34%-ǵa tómendegenin atap ótken jón, sondaı-aq tósek-oryndar sany 2 705 birlikke artqan.