Elordalyq úkimettik emes uıymdar (ÚEU) qala dárihanalaryndaǵy dári-dármek baǵasyna qoǵamdyq monıtorıng júrgizdi. Maqsat – pnevmonııa men koronavırýs ınfeksııasyn emdeýde qajet dári-dármekterge shekti ruqsat etilgen baǵanyń kóterilýine jol bermeý.
"Búgin bizdiń qoǵamdyq birlestiktiń, "Damý" qaýymdastyǵynyń ókilderi, "Kameda" QQ eriktileri, jergilikti atqarýshy organdardyń ókilderi qala dárihanalarynda boldy. Monıtorıng jáne reıd kezinde biz dárihanalardaǵy dári-dármekterdiń qol jetimdiligi men baǵalaryn bekitilgen ataýlar boıynsha qarastyramyz. Olarǵa dene qyzýyn tómendetetin, antıkoagýlıanttar, antıbıotıkter, vırýsqa qarsy dári-dármekter kirdi. Biz úshin, qoǵam belsendileri retinde, azamattardyń dári-dármekterdi qoljetimdi baǵamen satyp alýy óte mańyzdy", deıdi "Rýhanı qoǵam álemi" qoǵamdyq birlestiginiń tóraǵasy Lımana Koıshıeva.
Monıtorıng barysynda qoǵam belsendileri azamattardy koronavırýs ınfeksııasynyń aldyn alý úshin sanıtarlyq normalardy saqtaýǵa shaqyrdy. Habarlanǵandaı, Nur-Sultanda dári-dármek baǵasyn negizsiz kótergendermen kúres kúsheıdi.
Dári-dármektiń baǵasy qymbattaǵany anyqtalsa, azamattar iKOMEK 109 biryńǵaı baılanys ortalyǵyna, sondaı-aq +7 775 160 55 32 WhatsApp nómirine habarlama jiberýine bolady. Úkimet pen elorda ákimdigi dári-dármekterdi satyp alý men ákelý rásimderin jeńildetý, logıstıka boıynsha qoldaý kórsetýde.
Sonymen birge, qalalyq prokýratýra, polısııa departamentteri, memlekettik kirister, ekonomıkalyq tergeý, farmasevtıkalyq baqylaý qyzmetkerlerinen turatyn mobıldi top dári-dármekpen alypsatarlyq faktilerin boldyrmaý úshin kúndelikti jumys isteıdi. Atap aıtqanda, I-teka qosymshasyn qoldana otyryp, áleýmettik jelilerdegi (Instagram, Facebook, telegram, WhatsApp) habarlamalardy zerdeleý arqyly baǵalar únemi qadaǵalanady.
