Ekologııa, geologııa jáne tabıǵı resýrstar mınıstri Maǵzum Myrzaǵalıev qorshaǵan ortany lastap, tabıǵatqa aıaýsyzdyq tanytqandarǵa salynatyn aıyppul mólsheri kóbeıetinin aıtty. Ondaı zań buzǵan azamattarǵa jergilikti atqarýshy organnyń kómegimen dál sol jerde aıyppul salý josparlanyp otyr.
Mınıstrdiń aıtýynsha, sońǵy ýaqytta Qazaqstan aýmaǵynda tirkelgen tabıǵatty lastaý jáne jan-janýarlarǵa qorlyq kórsetý faktileri olarǵa qatysty eki túrli shara qoldanýǵa túrtki bolyp otyr. Onyń birinshisi aǵartýshylyq bolsa, ekinshisi – jazalaý.
"О́kinishke qaraı, sońǵy aptada tabıǵatqa aıaýsyzdyq tanytqan jaıttardyń kýási boldyq. Aqtaýdaǵy ıtbalyqtardy uryp-soǵý faktisi, Býrabaıdaǵy úıilip jatqan qoqystar, Almatydaǵy osy jyly ǵana jóndeýden ótken botanıkalyq saıabaqty qıratý faktileri, Almaty mańynda ornalasqan "Pervoımaıdaǵy" Qyzyl kitapqa engen lotostardy julyp, Instagramǵa jarııa etý, sondaı-aq biregeı Kóbeıtuz kólinen tuz shyǵarý jáne satý faktileri... Bul tek bizge belgili bolǵan jaıttar. Osymen qalaı kúresemiz? Onyń eki tásili bar. Birinshisi – ekologııalyq bilim berý. Biz halyqtyń ekologııalyq oı-sanasyn ózgertip, ózimiz úlgi bolyp, balalardy tabıǵatqa uqypty qaraýdy úıretýimiz kerek", - deıdi Myrzaǵalıev.
Ekologııa mınıstri úıretýdi qarapaıym dúnıelerden bastaý kerek ekenin aıtty. Máselen, qoqysty laqtyrmaı, órtemeı, alyp ketý, balalardy ósimdikter men janýarlardy kútýge úıretip, árbir adam tabıǵatty qorǵaý qyzmetine belsendi qatysý kerek deıdi.
"Ekinshi tásil – aıyppul salý. Sońǵy kúnderi týrısterdiń kóbeıgenin baıqadyq. Biraq, týrıster barǵan jerlerde kóp qoqys qaldy. Bizge «qoqys konteınerlerin qoıyńyzdar» dep jıi aıtady. Alaıda, tájirıbe kórsetkendeı, biz neǵurlym kóp konteıner qoısaq, azamattar soǵurlym kóp qoqys shashady. Osyǵan oraı, biz aıyppul salýǵa májbúrmiz. Ishki ister mınıstrligimen osy suraqty pysyqtadyq. Aldaǵy demalys kúnderinen bastap monıtorıng jasap, qorshaǵan ortany lastaǵan azamattar bolsa, olarǵa jergilikti jerlerde shara qabyldaý úshin ulttyq parkter men demalys aımaqtary boıynsha reıd júredi. Qoqys tastaǵandarǵa aıyppul salamyz. Búgin men Memleket basshysymen sóılestim. Prezıdent tabıǵatqa zııan tıgizgen zań buzýshylarǵa qatysty jaýapkershilikti kúsheıtý jáne aıyppul mólsherin ulǵaıtý jaǵyn qarastyrýdy tapsyrdy", - dedi Myrzaǵalıev.
