Berik Ýálıdiń aıtýynsha, Memleket basshysy Qasym-Jomart Toqaevtyń jumys kestesi óte tyǵyz. Prezıdent memlekettik organdardyń basshylarymen, qoǵam ókilderimen kezdesip, konferensııalar ótkizip, josparlanǵan is-sharalarǵa qatysady.
– Qasym-Jomart Kemeluly aptasyna jeti kún jumys isteıdi dep kesip aıta alamyn, týyndaǵan qıyndyqtarǵa shuǵyl jaýap berip jatady. Daǵdarysqa qarsy kún tártibimen qatar, ol memleket damýynyń uzaq merzimdi mindetterine: ekonomıkany, áleýmettik salany qoldaý máselelerine úlken kóńil bóledi, – deıdi Prezıdenttiń baspasóz hatshysy.
Sondaı-aq ol Prezıdenttiń áleýmettik jelilerdegi keıbir jazbalarynyń nege kesh jarııalanatynyn da túsindirdi.
– Prezıdenttiń Twitter-degi keı jazbalary túnde paıda bolatynyn durys baıqaǵansyzdar. О́zderińiz bilesizder, Memleket basshysy el ómirindegi jaǵdaılardy qalt jibermeı qadaǵalap otyrady jáne buqaralyq aqparat quraldary men áleýmettik jelilerdegi málimettermen tanysýǵa árqashan ýaqyt tabady. Eger Qasym-Jomart Kemeluly qajet dep sanasa, onda ol qoǵamdy eleń etkizgen mańyzdy oqıǵalarǵa qatysty óz kózqarasy týraly kez kelgen ýaqytta jazba jarııalap, qajetti nusqaýlar beredi. Jumys kestesiniń tyǵyz bolýyna baılanysty keıde mundaı jazbalary kesh shyǵýy múmkin ekendigi túsinikti bolar, – dep túsindirdi Berik Ýálı.
Prezıdent baspasóz hatshysynyń aıtýynsha, Qasym-Jomart Toqaev osylaısha barlyq memlekettik qyzmetkerge úlgi bola otyryp, osyndaı syn-saǵaty týǵan ýaqytta qalaı jumys isteý kerektigin kórsetedi.
Aıta keteıik, Prezıdent tabıǵat aıasyndaǵy el azamattarynyń ádepsizdigin synaǵan jazbasyn keshe Twitter-de túngi 01:30 ýaqytynda jarııalaǵan edi.
