HOK pen Japonııa úkimetiniń birlesken sheshimi álem halqy úshin aıtarlyqtaı jańalyq bolǵan joq. Sebebi, COVID-19 indeti ýshyǵyp, jaǵdaı kún sanap qıyndap bara jatyr edi. Kóptegen elder karanın jáne tótenshe jaǵdaı rejımin jarııalady. Al bul óz kezeginde irikteý kezeńderin ótkizýge kedergi keltirdi. Sportshylardyń oıyn qarsańynda babyna enýi úshin de bul qıyn kezeń sanaldy. Osy oraıda, Olımpıadany uıymdastyrýshylar tarıhta mańyzdy sheshim qabyldap, jazǵy oıyndardy 2021 jyldyń 23 shildesi men 8 tamyzy aralyǵyna aýystyrdy.
Búgin, 2020 jyldyń 23 shildesinde álem jankúıerleri mańyzdy datany atap ótýde. Tórtjyldyqtyń eń mańyzdy ári aýqymdy sporttyq dodasy – Tokıo Olımpıadasynyń bastalýyna týra bir jyl qaldy. Indettiń jalǵasýyna baılanysty uıymdastyrý komıteti barlyq is-sharalardy onlaın rejımde ótkizýdi jón sanaǵan.
"Oıynnyń bastalýyna bir jyl ǵana ýaqyt qaldy. Bizdi alda úlken mindetter kútip tur. Osy oraıda, bizdiń japonııalyq áriptesterimiz premer-mınıstr Sındzo Abe, "Tokıo-2020" prezıdenti Morı Iosıro, gýbernator Koıke Iýrıko, sondaı-aq, sportshylar men barlyq Jazǵy Olımpıadalyq halyqaralyq federasııalarǵa, UOK-ter men demeýshilerge, tele-radıotaratý quqyǵyn ıelengenderge alǵysymdy aıtamyn. Olardyń qoldaýynsyz biz mundaı tarıhı sheshimdi qabyldaı almas edik. Biz japon tarapymen birlese otyryp, barlyq mańyzdy qadamdardy jasaýǵa daıynbyz. Osylaısha, biz uıymdastyrý komıtetimen birge keıinge qaldyrylǵan Tokıo-2020 oıyndaryn esten ketpeıtin merekege, adamzattyń yntymaq-birligin pash etetin doda retinde ótkizemiz. Birlik bolsa, bizden myqty eshkim joq ekenin kórsetemiz", - dedi HOK prezıdenti Tomas Bah myrza.
Tokıodaǵy Olımpıada jáne Paralımpıada oıyndaryn uıymdastyrý komıteti oıynǵa qoldaý kórsetken barsha jankúıerge jáne sportshylarǵa alǵys retinde vıdeofılm kórsetedi. Al is-sharalar olımpıadalyq kanaldyń platformasynda tikeleı efırde kórsetiledi.
