"Sátbaevtaǵy jaǵdaıǵa qatysty qoǵamnyń narazylyǵy oryndy. Rasymen, bul oqıǵa bárimizdiń júregimizdi aýyrtyp, janymyzdy jabyrqatty. Barlyq ata-analardyń ashýy men yzasy da túsinikti. Degenmen, osyndaı qylmyskerlerdi jazalaý zań negizinde júrgizilýi kerek. Búldirshinge zorlyq-zombylyq kórsetkender zań aldynda qatań jaýap beredi. Ol – aqıqat nárse. Eshkimniń buǵan kúmáni bolmaýy kerek", deıdi Senat Tóraǵasy.
Máýlen Áshimbaevtyń aıtýynsha, byltyr Memleket basshysy halyqqa Joldaýynda bala quqyǵyn qorǵaý máselesine aıryqsha nazar aýdaryp, olarǵa qatysty jasalatyn qylmystarǵa jazany kúsheıtý týraly tapsyrma berdi. Soǵan baılanysty Parlament Qylmystyq kodekske irgeli ózgerister engizdi. Búginde baldyrǵandarǵa qatysty jasalǵan zorlyq-zombylyq faktisi boıynsha qylmysker jıyrma jylǵa nemese ómir boıyna bas bostandyǵynan aıyrylýy múmkin ekenin atap ótti.
Senat Tóraǵasy sondaı-aq: "Zorlyq-zombylyq áreketi orta sanattan aýyr dárejeli qylmys túrine ózgertildi. Mundaı jaǵdaıda taraptar tatýlasa almaıdy. Burynǵy tájirıbede taraptardyń ózara tatýlasýynyń nátıjesinde talaı adamnyń qylmystan jaltaryp ketkeni belgili. Endi ondaı olqylyqqa jol joq. Jańa zań normalaryna sáıkes mundaı qylmys jasaǵandar túrmeden merziminen buryn bosap ta shyǵa almaıdy, raqymshylyqqa da ilinbeıdi. Sondyqtan qoldanystaǵy zańnama boıynsha qylmyskerlerdi bultartpas aýyr jaza kútip tur. Shornaqta áleýmettik-turmystyq janjal oryn alǵany belgili. Biraq muny keıbireýler etnosaralyq janjalǵa aınaldyrǵysy kelip, jelilerde jalǵan aqparattar, zańsyz áreketterge shaqyrǵan úndeýler taratýda. Desek te, biz quqyqtyq memlekette ómir súrip jatyrmyz. Sol sebepti, kez kelgen másele zań sheńberinde sheshilýi kerek. Sonda ǵana zań ústemdigi ornaǵan, ár azamattyń quqyǵy qorǵalatyn, qaýipsizdigi qamtamasyz etiletin órkenıetti qoǵam qura alamyz", deıdi Máýlen Áshimbaev.
Sóziniń sońynda Senat Tóraǵasy: "Qazirgi tańda indetpen betpe-bet kelgen elimiz kúrdeli kezeńdi bastan ótkerýde. Osyndaı syn-saǵatta birligimizge syzat túsirmeý – asa mańyzdy. Sol úshin ár nárseni aqylǵa jeńdirip, áreket eteıik", deıdi Máýlen Áshimbaev.
