Qala turǵyny tyıym salynǵan zatty sháıdiń ishine jasyrǵan. Osydan eki kún buryn JD-158/7 mekemesiniń jedel-rejım toby azyq-túlik pen qajetti zattardy jazasyn óteýshi dosyna tapsyramyn dep, biraq ózi esirtki bermek bolǵan A. esimdi er adamdy ustady.
Bul fakt tintip-tekserý barysynda anyqtaldy. Jambyl oblysy Baızaq aýdany Sarykemer aýylynyń turǵyny ózge azyq-túliktermen qatar qaltaǵa salmaǵy 1,5 keli túıirshiktelgen shaı alyp kelgen.
Ashyp qaraý barysynda quramynan belgisiz qoıý jasyl tústes ózine tán ıisi bar túıirshikter tabyldy. Oqıǵa ornyna Taraz qalalyq Polısııa basqarmasy polısııa bóliminiń tergeý-jedel toby shaqyryldy. Sot hımııalyq taldamasyna sáıkes tárkilengen zat segiz gramm "qarasora" esirtki tektes ósimdigi ekendigi anyqtalǵan. Qazirgi tańda kúdikti ýaqytsha tergeý ızolıatoryna toǵytyldy.
Atalǵan fakti boıynsha QR Qylmystyq kodeksiniń 296-baby 2-tarmaǵy boıynsha qylmys negizinde sotqa deıingi tergeý júrgizilip jatyr. Dosyna kómektesý úshin zańdy aınalyp ótpek bolǵan er adam buǵan deıin QR Qylmystyq kodeksiniń 259-bap 3-tarmaǵy “Uıymdasqan top, qylmystyq uıym qurý jáne oǵan basshylyq jasaý sol sııaqty oǵan qatysý” boıynsha isti bolǵan. 12 jyl bas bostandyǵynan aıyrylyp, atalǵan JD-158/7 mekemesinde jazasyn ótep 2018 jyly ǵana bosatylǵan.
